უკრაინის პრეზიდენტის ოფისის ხელმძღვანელი, ანდრეი ერმაკი, თავის გუნდთან ერთად, ვაშინგტონში უკრაინის საკითხებში აშშ-ის პრეზიდენტის სპეციალურ წარმომადგენელს, კიტ კელოგს შეხვდა.
„განვიხილეთ ფრონტზე არსებული ვითარება, სტამბოლში გამართული შეხვედრების შედეგები, რუსეთის წინააღმდეგ სანქციების გაძლიერებისა და უკრაინის სამხედრო დახმარების გაზრდის მნიშვნელობა. ასევე, ვისაუბრეთ რუსეთის მიერ გატაცებულ ბავშვებზე“, – განაცხადა ერმაკმა.
ერმაკის თქმით, კელოგს განუცხადა, რომ რუსეთი ყველაფერს აკეთებს, რათა არ შეწყვიტოს ცეცხლი და ეს „ძალით უნდა შეაჩერონ“.
„უკრაინამ ყველაფერი გააკეთა ომის დასამთავრებლად. რუსეთი ნებაყოფლობით თუ არ წყვეტს ცეცხლს, ჩვენ იძულებული ვართ, ჩავატაროთ ოპერაციები და გავანადგუროთ მათი სამხედრო პოტენციალი“, – განაცხადა ერმაკმა.
უკრაინის პრეზიდენტის ოფისის ხელმძღვანელის განმარტებით, მადლობა გადაუხადა აშშ-ის პრეზიდენტს, დონალდ ტრამპს, ამერიკელ ხალხს და ორივე პარტიას უკრაინის მხარდაჭერისთვის.
შეგახსენებთ, დღეს უკრაინის დელეგაცია ეკონომიკის მინისტრ, იულია სვირიდენკოს ხელმძღვანელობით აშშ-ში დონალდ ტრამპის გუნდის წარმომადგენლებთან შესახვედრად ჩავიდა.