ბელგიაში მკვლელობისთვის 38 წლის ქართველი კაცი დააკავეს.
ქართველმა საზოგადოებრივ ტრანსპორტში 76 წლის კაცი დანით მოკლა. ასევე დაჭრა მგზავრი, რომელიც მსხვერპლის დახმარებას ცდილობდა. მგზავრების ცნობით, თავდასხმა სრულიად არაპროვოცირებული იყო და მსხვერპლი, სავარაუდოდ შემთხვევით შეირჩა. ავტობუსის მძღოლს შოკის გამო საავადმყოფოში მკურნალობა დასჭირდა.
მედია წერს, რომ პოლიცია ადგილზე სწრაფად მივიდა, რადგან მათ მიიღეს შეტყობინება, რომ ავტობუსში ვიღაც უცნაურად იქცეოდა. ინციდენტის შემდეგ, ეჭვმიტანილი ავტობუსიდან ჩამოვიდა და პოლიციამ დააკავა.
VRT News-ის ცნობით, თავდასხმამდე რამდენიმე საათით ადრე ეჭვმიტანილი შევიდა კუთხის მაღაზიაში, რომელიც დანით თავდასხმის ადგილიდან რამდენიმე კილომეტრში მდებარეობდა. მან მაცივრიდან Red Bull-ის ორი ქილა ამოიღო, ფული არ გადაიხადა და ინგლისურად თქვა: „ფული არ მაქვს“, „პოლიციას დაურეკეთ“. მაღაზიის მეპატრონე ამბობს, რომ მამაკაცს „უცნაური გამომეტყველება“ ჰქონდა და „დაჭრილი“ ჩანდა. მან პოლიცია გამოიძახა, თუმცა მამაკაცის დაკავება ვერ შეძლეს.