ამერიკის ლიდერმა, დონალდ ტრამპმა განაცხადა, რომ აშშ სთავაზობს როგორც კიევის მიერ ტერიტორიულ დათმობებს, ასევე რუსეთის მიერ უკრაინის ნაწილების დაბრუნებას.
„თქვენ უყურებთ ტერიტორიას, რომლისთვისაც სამწელიწად-ნახევრის განმავლობაში იბრძოდნენ, სადაც ბევრი რუსი დაიღუპა, ბევრი უკრაინელი. ასე რომ, ჩვენ ამას ვუყურებთ, მაგრამ სინამდვილეში გვინდა ტერიტორიის ნაწილის დაბრუნება და სადღაც გაცვლა. ეს რთულია. ეს ასე მარტივი არ არის. ეს ძალიან რთულია“, – აღნიშნა აშშ-ის პრეზიდენტმა.
მან ასევე განაცხადა, რომ პუტინს „ძალიან მალე“ შეხვდება.
„მაგრამ მე ძალიან მალე შევხვდები პრეზიდენტ პუტინს. ეს შეიძლება უფრო ადრეც მოხდეს, მაგრამ ვფიქრობ, რომ არსებობს უსაფრთხოების ზომები, შეთანხმებები, რომლებიც, სამწუხაროდ, ხალხმა უნდა მიიღოს. წინააღმდეგ შემთხვევაში, მე ამას ბევრად უფრო ადრე გავაკეთებდი. მასაც სურს. მას სურს შეხვედრა“, – თქვა ტრამპმა.
ამერიკელმა ლიდერმა არ გაამხილა შემოთავაზებული შეხვედრის ადგილმდებარეობა, მაგრამ ხაზგასმით აღნიშნა, რომ ის „ძალიან პოპულარული ადგილი იქნება მრავალი მიზეზის გამო“.
ტრამპმა თქვა, რომ ზელენსკი მზად უნდა იყოს „რაღაცის ხელმოწერისთვის“ უკრაინაში ომის მოსაგვარებლად.