აშშ-ის სახელმწიფო დეპარტამენტი პოტენციური დეპორტაციის მიზნით 55 მილიონზე მეტი უცხოელის მოქმედ ვიზას ამოწმებს, – ამის შესახებ „ესოშიეითიდ პრესი“ წერს.
აშშ-ის სახელმწიფო დეპარტამენტში განაცხადეს, რომ ამოწმებენ 55 მილიონზე მეტი უცხოელის მონაცემებს, რომლებსაც აქვთ აშშ-ის ვიზა, ვიზების შესაძლო გაუქმების ან იმიგრაციული წესების დარღვევების გამო დეპორტაციის მიზნით.
„ესოშიეითიდ პრესის“ მიერ გაგზავნილ კითხვაზე წერილობით პასუხში აშშ-ის სახელმწიფო დეპარტამენტმა აღნიშნა, რომ ვიზის ყველა მფლობელი გადის „მუდმივ შემოწმებას“ მოთხოვნებთან შესაბამისობის დასადგენად. ამ პროცესის ფარგლებში ხდება სამართალდამცავი ორგანოების მონაცემების, საიმიგრაციო ჩანაწერების და ნებისმიერი სხვა ინფორმაციის ანალიზი, რომელიც ვიზის გაცემის შემდეგ გახდა ცნობილი.
ვიზის გაუქმების საფუძველი შეიძლება გახდეს დოკუმენტის ვადაგასულობა, დანაშაულებრივი საქმიანობა, საზოგადოებრივი უსაფრთხოებისთვის საფრთხის შექმნა, ასევე ტერორისტულ ორგანიზაციებში მონაწილეობა ან მათი მხარდაჭერა.
მიმდინარე კვირის დასაწყისში აშშ-ის სახელმწიფო დეპარტამენტმა განაცხადა, რომ ტრამპის თეთრ სახლში დაბრუნების შემდეგ, გაუქმდა 6000-ზე მეტი სტუდენტური ვიზა ვადის გადაცილებისა და ადგილობრივი, შტატის და ფედერალური კანონების დარღვევების გამო. ამასთან, 6000 ვიზიდან დაახლოებით 4000 გაუქმდა კანონების დარღვევების გამო, ხოლო დაახლოებით 200-300 ვიზა გაუქმდა ტერორიზმთან დაკავშირებული საკითხების გამო.