კიევში თავს დაესხნენ ჩეჩენი ეროვნების ადამ ოსმაევს, რომელსაც რუსეთის ხელისუფლება 2012 წელს პრეზიდენტ ვლადიმერ პუტინზე თავდასხმის მომზადებაში სდებს ბრალს. მაშინ ოსმაევს დაუსწრებლად პატიმრობაც შეუფარდეს, თუმცა ის უკრაინაში იმყოფებოდა და დონბასში იბრძოდა.
კიევის ცენტრში თავდასხმის დროს მან მძიმე ჭრილობა მიიღო. უკრაინის შსს-ს წარმომადგენლის, არტემ შევჩენკოს ცნობით, თავდამსხმელი ოსმაევის და მისი მეუღლის, ამინა ოკუევას ნდობით სარგებლობდა. მას უცხოელ ჟურნალისტად იცნობდნენ. ის ოჯახს ინტერვიუს აღების მიზნით დაუკავშირდა. ოსმაევის მეუღლემ თავდაცვის მიზნით საპასუხო ცეცხლი გახსნა და თავდამსხმელი დაჭრა.
ამჟამად ორივე მძიმე ცეცხლნასროლი ჭრილობებით საავადმყოფოში იმყოფება.
შსს-ს წარმომადგენლის ცნობით, თავდასხმისას ცეცხლი მანქანიდან გაიხსნა. შემთხვევის ადგილზე სამი პისტოლეტი ნახეს – ორი “მაკაროვი“ და ერთი “გლოკი“. პოლიციამ გამოძიება უკვე დაიწყო.