წყნეთი-ახალდაბის საავტომობილი გზა მეწყერის საშიშროების გამო ორმხრივად გადაკეტილია. ადგილზე გეოლოგების ჯგუფი და საპატრულო ეკიპაჟია მობილიზებული.
“პირველს” გეოლოგმა გიორგი გაფრინდაშვილმა განუცხადა, რომ მიმდიბარე ტერიტორიაზე უკვე მეორედ მოხდა მიწის მასის ჩამოშლა, რის გამოც გზის გადაკეტვა მოხდა.
“უსაფრთხოების ზომების დაცვის მიზნით, გეოლოგები და საპატრულო პოლიციის წარმომადგენლები მთელი ღამის განმავლობაში ვიქნებით ადგილზე. ჩემი ინფორმაციით, დაახლოებით საათნახევარში კვლავ ნალექია მოსალოდნელი. ამ დროისთვის ადგილზე საგანგაშო არაფერი ხდება”,- აღნიშნა “პირველთან” საუბარში გეოლოგმა.
უამინდობის გამო საგანგებო სიტუაციების მართვის სააგენტოში დღის განმავლობაში 300-ზე მეტი ზარი განხორციელდა. მოქალაქეები ძირითადად ეზოებისა და საცხოვრებელი სახლების სარდაფების დატბორვის გამო ითხოვენ დახმარებას.
“პირველს” საგანგებო სიტუაციების მართვის სააგენტოში განუცხადეს, რომ შეტყობინებები სხვადასხვა რეგიონიდან არის დაფიქსირებული, მათ შორის თბილისიდან.
“მთელი დღის განმავლობაში უამინდობაა საქართველოს თითქმის მთელ ტერიტორიაზე. სამცხე-ჯავახეთის ერთ-ერთ სოფელში მოხუცი ქალი სახლში ჩარჩა, თუმცა მაშველებმა მისი გამოყვანა დროულად მოახერხეს და ის ახლა უსაფრთხოდ იმყოფება. დღის მეორე ნახევრიდან სტიქიის ეპიცენტრი სამცხე-ჯავახეთი იყო. ბორჯოთან ახლოს ჩამოიშალა მიწის მცირე მასები, რის გამოც გარკვეული პერიოდი მოძრაობა შეზღუდული იყო. ადგილზე დროულად მივიდა სპეც-ტექნიკა, რომელმაც გაწმენდითი სამუშაოები ოპერატიულად შეასრულა”,- აცხადებენ საგანგებო სიტუაციების მართვის სააგენტოში.
რაც შეეხება დედაქალაქს, სააგენტოს ინფორმაციით, ამ დროისთვის სიტუაცია სტაბილურია და არც ერთ რაიონში რაიმე განსაკუთრებული არ ხდება.
დაშავებულებისა და მსხვერპლის შესახებ ინფორმაცია არ ვრცელდება. სინოპტიკოსები საქართველოში უამინდობას 12 ივნისამდე ვარაუდობენ.
“პირველი” წყნეთი-ახალდაბის გზაზე დღეს არსებული მდგომარეობის ამსახველ ფოტომასალას ექსკლუზიურად გთავაზობთ.