საქართველოს პარლამენტის თავმჯდომარე შალვა პაპუაშვილი ალბანეთის პარლამენტის თავმჯდომარის მოადგილე კლოდიანა სპახიუს შეხვდა.
შალვა პაპუაშვილმა მადლიერება გამოხატა ალბანეთის მთავარეპისკოპოს იოანეს საქართველოს კათოლიკოს-პატრიარქის, ილია მეორის სამძიმარზე ჩამოსვლისთვის.
შეხვედრაზე აღინიშნა ორ ქვეყანას შორის თანამშრომლობის მზარდი პოტენციალი, როგორც ორმხრივ დონეზე, ისე დასავლეთ ბალკანეთის რეგიონის ფარგლებში. აღინიშნა ევროკავშირში გაწევრიანების საერთო მისწრაფება და ამ მიმართულებით თანამშრომლობის მნიშვნელობა.
საუბარი, აგრეთვე, შეეხო ორმხრივი თანამშრომლობის საკითხებს, ხაზი გაესვა საპარლამენტო თანამშრომლობის გაღრმავების მნიშვნელობას.
შეხვედრაზე, აგრეთვე, განიხილეს ორი ქვეყნის ურთიერთობები ევროკავშირსა და ნატო-თან.
შეხვედრა მონტენეგროს ქალაქ ბუდვაში მიმდინარე ხმელთაშუა ზღვის საპარლამენტო ასამბლეის (PAM) წევრი და პარტნიორი ქვეყნების პარლამენტების თავმჯდომარეების რიგით პირველი სამიტის ფარგლებში შედგა.
საპარლამენტო დელეგაციის შემადგენლობაში, რომელსაც საქართველოს პარლამენტის თავმჯდომარე შავი ზღვის საპარლამენტო ასამბლეის პრეზისენტის რანგში ხელმძღვანელობს, მონაწილეობს ეკონომიკური პოლიტიკის კომიტეტის თავმჯდომარის პირველი მოადგილე, შავი ზღვის ეკონომიკური თანამშრომლობის ორგანიზაციის საპარლამენტო ასამბლეაში საქართველოს პარლამენტის მუდმივმოქმედი დელეგაციის ხელმძღვანელი ირაკლი მეზურნიშვილი.