ირლანდიის იუსტიციის მინისტრის, ჯიმ ო’კალაჰანის განცხადებით, მიუხედავად იმისა, რომ უკრაინელი ლტოლვილების სამშობლოში დაბრუნების წამახალისებელი მექანიზმის შექმნაზე მუშაობა მიმდინარეობს, რეპატრიაციის თანხის გადახდის შესახებ განცხადებას ჯერ ვერ გააკეთებს.
ო’კალაჰანის ეს კომენტარი მოჰყვა გამოცემა Sunday Times-ში გამოქვეყნებულ ინფორმაციას იმის შესახებ, რომ ირლანდიაში მცხოვრები უკრაინელი ლტოლვილები ირლანდიის მთავრობისგან თანხებს მხოლოდ მას შემდეგ მიიღებენ, როდესაც ისინი საკუთარ ქვეყანაში დაბრუნდებიან.
მინისტრმა აღნიშნა, რომ მას ჯერ არ მიუღია მთავრობის საბოლოო თანხმობა იმ გეგმაზე, რომელიც, სახლში დაბრუნების სანაცვლოდ, უკრაინელი ლტოლვილებისთვის თანხის გადახდას ითვალისწინებს.
მისივე თქმით, ამ საკითხის მნიშვნელობას კარგად აცნობიერებს: „უკრაინის მთავრობის წარმომადგენლებთან და ამ ქვეყნის შინაგან საქმეთა მინისტრთან საუბრის შემდეგ გამოიკვეთა, რომ ლტოლვილების სამშობლოში დაბრუნებით ისინი ძალიან არიან დაინტერესებულნი“.
მინისტრის განმარტებით, არიან ისეთი ადამიანებიც, ვისაც ირლანდიაში დარჩენა სურს. ამიტომ, საჭიროა „სხვადასხვა მექანიზმების არსებობა იმის უზრუნველსაყოფად, რომ ორივე კატეგორიის ადამიანების სურვილი დაკმაყოფილდეს“.
მან ასევე განაცხადა, რომ სამშობლოში დაბრუნების მსურველთათვის თანხის გადახდების დეტალებზე არ ისაუბრებს, რადგან ეს „მთავრობაში მისი კოლეგების მიმართ უპატივცემულობა“ იქნება, თუმცა ადასტურებს, რომ „იარსებებს მექანიზმი იმ ადამიანების წასახალისებლად, ვისაც უკრაინაში დაბრუნებას აპირებს“.
გასულ თვეში, ირლანდიის მთავრობამ განაცხადა, რომ შეწყვეტს იმ ტურისტული და კომერციული საცხოვრებლების გამოყენებას, სადაც ამჟამად უკრაინიდან ჩამოსული 16 000-მდე ადამიანი არის განთავსებული.
მინისტრმა ჯიმ ო’კალაჰანმა ამ საკითხზე შეთანხმებას მთავრობის კაბინეტის იუსტიციის, მიგრაციისა და სოციალურ საქმეთა კომიტეტში უკვე მიაღწია.
ეს პროცესი აგვისტოში დაიწყება და ეტაპობრივად, ექვსი თვის განმავლობაში გაგრძელდება.
იქ მცხოვრებ პირებს ცვლილების შესახებ მინიმუმ სამი თვით ადრე ეცნობებათ, საცხოვრებელი ფართები კი კვლავ ტურიზმისა და კერძო გაქირავების სექტორს დაუბრუნდება.
ასევე მიღწეულია შეთანხმება, რომ მიმდინარე წლის ბოლო ოთხი თვის განმავლობაში ეტაპობრივად შეიცვალოს (შემცირდეს) 600-ევროიანი „საცხოვრებლის გადახდის სქემა“, ხოლო მომავალი წლის მარტში ის მთლიანად შეწყდება.
საცხოვრებლის გადახდის 400 ევრომდე შემცირება, შესაძლოა, სექტემბრიდან ამოქმედდეს, რაც საერთო საცხოვრებლებში მყოფ დაახლოებით 42 000 ადამიანს შეეხება.
პარალელურად, ირლანდიის მთავრობა ევროკავშირთან ერთად იმუშავებს უკრაინაში ნებაყოფლობითი დაბრუნებისა და რეინტეგრაციის პროგრამის შემუშავებაზე, რომელიც, სავარაუდოდ, 2027 წლის მარტიდან ამოქმედდება.
https://www.rte.ie/news/2026/0510/1572629-ukraine-repatriation-payment/