ირანის მიერ ჰორმუზის სრუტის ჩაკეტვამ გლობალური ვაჭრობის ლანდშაფტი მნიშვნელოვნად შეცვალა, რადგან ეს არის ერთ-ერთი ყველაზე მთავარი საზღვაო გზა ახლო აღმოსავლეთიდან დანარჩენ მსოფლიოში ნავთობისა და სხვა საქონლის ტრანსპორტირებისთვის. შესაბამისად, ამ გზის ბლოკირებამ ენერგორესურსების გლობალური მიწოდების შეფერხება გამოიწვია.
ამ პირობებში, საუდის არაბეთი საერთაშორისო ლოგისტიკურ ცენტრად იქცა. ერ-რიადმა ხუთი ახალი სახმელეთო სატვირთო დერეფანი აამოქმედა, რათა ტრანსპორტის სხვადასხვა სახეობებს შორის კავშირი გაეძლიერებინა. ეს მარშრუტები სპარსეთის ყურის პორტებს ქვეყნის ცენტრალურ და ჩრდილოეთ ნაწილებთან აკავშირებს და წითელი ზღვის პორტებამდე და ჩრდილოეთ საზღვრამდე აღწევს.
საავტომობილო და სარკინიგზო ტრანსპორტის კომბინირებული ქსელის მეშვეობით, სატვირთო მანქანების დიდი კოლონები, რომლებიც არაბეთის უდაბნოს კვეთენ, გლობალური ეკონომიკის „უსაფრთხოების სარქველად“ იქცნენ.
ამავდროულად, საუდის არაბეთის, არაბთა გაერთიანებული საამიროებისა და ომანის ავტომაგისტრალები, რკინიგზა და პორტები უზრუნველყოფენ მიწოდების ალტერნატიულ ქსელს, რაც ჰორმუზის სრუტისთვის გვერდის ავლის საშუალებას იძლევა.
ისტორიული სავაჭრო გზების აღორძინება
საავტომობილო ტრანსპორტის გამოყენებას გაზრდამ ისტორიული სავაჭრო გზების აღორძინების იდეა კვლავ აქტუალური გახადა. ცოტა ხნის წინათ, საუდის არაბეთმა გამოაცხადა, რომ დასრულების ეტაპზეა იორდანიისა და სირიის გავლით თურქეთთან დამაკავშირებელი სარკინიგზო ხაზის პროექტის კვლევა, რომლის ხორცშესხმაც რეგიონულ თანამშრომლობასა და ვაჭრობას შეუწყობს ხელს.
„საუდის არაბეთის ლოჯისტიკური სასწაული“
საუდის არაბეთმა, ახალი მარშრუტების გააქტიურებითა და სახმელეთო ტრანსპორტისთვის ხელშეწყობის გზით, მთელი რიგი ზომები მიიღო, რათა გლობალური ვაჭრობის ნაკადი შეენარჩუნებინა. ანალიტიკოსებმა ეს ძალისხმევა შეაფასეს, როგორც „საუდის არაბეთის ლოჯისტიკური სასწაული“.
მაგალითად, კომპანია Ma’aden-მა, რამდენიმე კვირაში, 600-დან 3500-მდე გაზარდა სატვირთო მანქანების რაოდენობა, რომლებსაც საქონელი სპარსეთის ყურიდან წითელი ზღვის პორტებში გადააქვთ. ამ ნაბიჯმა ხელი შეუწყო სასუქების გლობალური დეფიციტის აღმოფხვრას და სასურსათო უსაფრთხოების გაძლიერებას.
ენერგომატარებლების ალტერნატიული მარშრუტები
ასევე მნიშვნელოვან ენერგეტიკულ არტერიას წარმოადგენს აღმოსავლეთ-დასავლეთის ნავთობსადენი („პეტროლაინი“), რომელიც საუდის არაბეთის აღმოსავლეთ ნაწილში არსებულ ნავთობის საბადოებს წითელი ზღვის პორტ იანბუსთან აკავშირებს. ეს ნავთობსადენი ჰორმუზისთვის გვერდის ავლის საშუალებას იძლევა და ნავთობის ექსპორტის უწყვეტობას უზრუნველყოფს.
ამავდროულად, არაბთა გაერთიანებულმა საამიროებმა გაზარდა ექსპორტი ფუჯაირას პორტის მეშვეობით, ხოლო ინფრასტრუქტურის ახალი პროექტები, როგორიცაა რკინიგზა და პორტების გაფართოება, განხილვის სტადიაშია.
ახალი სავაჭრო რუკა
ეს ცვლილებები რეგიონის სავაჭრო რუკის გადასხვაფერებას იწვევს. მსხვილი სატრანსპორტო კომპანიები, როგორიცაა, მაგალითად, MSC-ი და Maersk-ი, ტვირთების გადაზიდვას ახლა უკვე სახმელეთო გზებით აპირებენ.
საკვები პროდუქტები ბრიტანეთიდან საამიროებში ევროპის, ეგვიპტისა და საუდის არაბეთის გავლით ჩადის, შემდეგ კი, საამიროების ტერიტორიაზე, მატარებლებში ნაწილდება.
ჰორმუზის კრიზისმა, მთლიანობაში წარმოაჩინა გლობალური ეკონომიკის მდგრადობა, ხოლო საუდის არაბეთმა გაიმყარა თავისი პოზიცია სტრატეგიული ლოგისტიკური ჰაბის, „საუდის ხედვა 2030“-ის ფარგლებში, რომელიც, ინვესტიციებისა და თანამედროვე ინფრასტრუქტურის მეშვეობით, აზიის, აფრიკისა და ევროპის დაკავშირებას ისახავს მიზნად.