AXIOS-ის ინფორმაციით, ისრაელის პრემიერ-მინისტრი ბენიამინ ნეთანიაჰუ ოთხშაბათს საჯაროდ არ გამოჩენილა მას შემდეგ, რაც აშშ-ის პრეზიდენტმა დონალდ ტრამპმა ირანთან მიღწეული შეთანხმება წარადგინა და ხელი მოაწერა დოკუმენტს, რომელსაც ისრაელის ხელისუფლებაში სტრატეგიულ და პოლიტიკურ მარცხად აფასებენ.
როგორც გამოცემა იუწყება, ნეთანიაჰუ ისრაელის საზოგადოებას ირანთან დაპირისპირებაში „სრულ გამარჯვებას“ ჰპირდებოდა. საბოლოოდ კი, მას ტრამპის მიერ შეთავაზებული ურთიერთგაგების მემორანდუმის მიღება მოუწია, თანაც პრეზიდენტის მხრიდან არაერთი კრიტიკული განცხადების ფონზე – საპარლამენტო არჩევნებამდე სულ ოთხი თვით ადრე.
ნეთანიაჰუ საერთაშორისო ასპარეზზე თითქმის მარტო დარჩა იმ მოსაზრებით, რომ შეთანხმება შეცდომაა და სამხედრო მოქმედებები უნდა გაგრძელებულიყო. არაბთა გაერთიანებულმა საამიროებმაც კი, რომელიც სპარსეთის ყურის ქვეყნებს შორის ყველაზე მკაცრი პოზიციით გამოირჩეოდა, რეგიონულ კონსენსუსს დაუჭირა მხარი და შეთანხმების სასარგებლოდ გამოვიდა, წერს AXIOS-ი.
ვაშინგტონშიც ნეთანიაჰუს მოკავშირეები რესპუბლიკურ პარტიასა და კონსერვატიულ მედიაში თავს იკავებენ შეთანხმების მკვეთრი კრიტიკისგან, რადგან მას ტრამპის მხარდაჭერა აქვს.
როგორც AXIOS-ი იუწყება, საჯარო განცხადებების ნაცვლად, ისრაელის ოფიციალური პირები შეთანხმების შესახებ ღრმა შეშფოთებას ჟურნალისტებთან დახურულ ბრიფინგებზე გამოხატავენ.
ამავდროულად, ნეთანიაჰუსთან დაახლოებულმა მედიასაშუალებებმა, რომელთა უმრავლესობაც აქამდე ტრამპის აქტიური მხარდამჭერი იყო, აშშ-ის პრეზიდენტისა და მისი გუნდის კრიტიკა დაიწყეს.