ALDE – ლიბერალებისა და დემოკრატების ალიანსი ევროპისთვის, რომლის წევრი პარტია „ლელოა“, დღემდე არ პასუხობს და არ ემიჯნება პარტიის პოზიციას, რომელიც ტერორიზმს ამართლებს.
მას შემდეგ, რაც ტერორისტული აქტის ჩადენის მცდელობის ბრალდებით დაკავებული, „ძლიერი საქართველო – ლელოს“ ერთ-ერთ ლიდერი ალეკო ელისაშვილი სასამართლომ დამნაშავედ ცნო და 13 წლით თავისუფლების აღკვეთა მიუსაჯა, პარტია არ გმობს ტერორისტულ აქტს.
ფაქტობრივი მოცემულობისა და წარდგენილი მტკიცებულებების მიუხედავად, „ლელოს“ წევრები აცხადებენ, რომ სამხილები არ არსებობს, ბრალდება გამოგონილია და ფაქტობრივად, უმძიმესი დანაშაულის მცდელობის ლეგიტიმაციასა და გამართლებას ახდენენ. საგულისხმოა, რომ თავად მსჯავრდებულმა ბრალი აღიარა და სასამართლოზე განაცხადა, რომ ქმედების მიზეზი პროტესტი იყო, რომელიც ახრჩობდა.
„მახრჩობდა ის პროტესტი, რაც მქონდა და როგორც შემეძლო, ისე ვიმოქმედე. ეგრე გადავწყვიტე საჭიროდ, რომ მემოქმედა. არ გამომივიდა“, – აღნიშნა ელისაშვილმა.
სწორედ ამ ფონზე, „ალდე“, რომელიც მუდმივად ევროპულ ღირებულებებზე, კანონის უზენაესობაზე, უსაფრთხოებასა და ადამიანის უფლებების დაცვაზე აპელირებს, საკუთარი წევრი პარტიის ამგვარ პოზიციას ამ დრომდე რეაგირების გარეშე ტოვებს.