კინორეჟისორმა გოგა ხაინდრავამ ტელეკომპანია „ფორმულას“ წინააღმდეგ სასამართლო დავა მოიგო.
სასამართლოს გადაწყვეტილების მიხედვით, ტელეკომპანია „ფორმულას“ დაევალა ეთერში გასული მასალის უარყოფა, რომელშიც გამოხატული იყო ხაინდრავას მიმართ პატივისა და ღირსების შემლახავი ცილისწამება. „ფორმულას“ ასევე დაეკისრა მორალური ზიანის ანაზღაურება – 10 000 ლარის ოდენობით. დაცვის მხარე გადაწყვეტილების გასაჩივრებას გეგმავს.
საქმე ეხება ტელეკომპანია „ფორმულას“ ეთერში გასულ რამდენიმე სიუჟეტს, რომლებიც, გოგა ხაინდარავას განცხადებით, მის წინააღმდეგ ცრუ ინფორმაციას და ცილისმწამებას შეიცავდა. ერთ-ერთ ასეთ ცილისწამებად ხაინდარავა ასახელებს „ფორმულას“ რეპორტაჟს, სადაც ნათქვმია, თითქოს „ხაინდრავა საქართველოს ტერიტორიაზე ტრეფიკინგის ახორციელებდა, ქრთამის სანაცვლოდ 2 000 ადამიანის შემოყვანა და, საერთო ჯამში, ოთხი მილიონი დოლარი აიღო“.
როგორც ხაინდრავა აღნიშნავს, ადამიანის მიმართ ცილისწამება მკვლელობის ტოლფასია.
„სრულად დაკმაყოფილდა ჩემი სარჩელი. ეს სიცრუე და ბოროტი ცილისწამება, რომელიც გავრცელებული იყო, მთლიანად იქნა უარყოფილი“, – აღნიშნა ხაინდრავამ.
ამასთან, მისივე თქმით, ტელეკომპანია „ფორმულას“ საქმე სცდება სამოქალაქო დავას, რის გამოც პროკურატურაშიც სისხლის სამართლის საქმეც აღიძრა.
„იქ, სადაც დამნაშავეებად არიან გამოყვანილი პრემიერ-მინისტრი, შსს-ს მინისტრი, სუს-ის უფროსი, სუს-ის თანამშრომლები და საზღვრის დაცვის დეპარტამენტის თანამშრომლები, ლაპარაკი სამოქალაქო პროცესზე არ შეიძლება. ამან განაპირობა, რომ პროკურატურაშიც სისხლის სამართლის საქმე აღიძრა. ეს არის მკვლელობის ტოლფასი, როდესაც ცილს წამებ ადამიანს. ყველას არ აქვს შესაძლებლობა, თავი დაიცვას. გადაცემა არ არის, ვიღაცას ასეთი შეურაცხყოფა არ მიაყენონ. ეს ჩემი მხრიდან გაკეთდა იმიტომ, რომ ჭკუა ისწავლონ. მინდა, განვაცხადო: გამოყოფილი თანხით დავაარსებ ფონდს, რომელიც მედიატერორისგან დაიცავს მოქალაქეებს“, – თქვა ხაინდრავამ.