აშშ-ის პრეზიდენტი დონალდ ტრამპი აცხადებს, რომ მისი შვილი რუს ოლიგარქს ქორწილისთვის დახარჯულ თანხას დაუბრუნებს.
მისი თქმით, როდესაც შვილს, დონალდ ტრამპ უმცროსს რუს ოლიგარქ კრემლევთან დაკავშირებული საკითხის შესახებ ჰკითხა, ტრამპ-უმცროსმა უპასუხა, რომ რუს ოლიგარქს, რომელმაც მაისში, ბაჰამის კუნძულებზე მისი ქორწილის წვეულება დააფინანსა, დახარჯულ თანხას დაუბრუნებს.
„ეს ხომ დიდი ხნის წინ მოხდა. ასე რომ, როგორც ვიცი, ის დაბრუნებას აპირებს“,- განაცხადა ტრამპმა.
მანამდე, ტრამპმა აღნიშნა, რომ კრემლევს არ იცნობს და საქორწილო წვეულების გარშემო განვითარებულ აჟიოტაჟს „არც ისე დიდ საქმედ“ მიიჩნევს.
„ბევრი ადამიანისთვის მომიწყვია საქორწილო ზეიმი ლამაზ ადგილებში, მაგალითად, პალმ-ბიჩში, ჩემს კლუბ მარ-ა-ლაგოში. ისინი ქორწინდებიან, მე კი მათთვის წვეულებას ვაწყობ. ყოველივე ამის გათვალისწინებით, როგორც გავიგე, დონმა მას ფული დაუბრუნა“, – განაცხადა ტრამპმა.
დონალდ ტრამპ უმცროსმა და მისმა მეუღლემ, ბეტინა ანდერსონმა დაადასტურეს, რომ კრემლევმა მათი საქორწილო წვეულება ნაწილობრივ დააფინანსა. მათ ასევე განაცხადეს, რომ რუსი ოლიგარქისგან საჩუქრის მიღებაში პრობლემას ვერ ხედავდნენ. მათი თქმით, კრემლევის მიერ დაფინანსებული ღონისძიება საქორწილო ცერემონიის დასრულების შემდეგ გაიმართა.