22 წლის ლევან მამაგეიშვილი, რომელიც დაახლოებით ექვსი დღის წინ დიდუბის ავტოსადგურ “ოკრიბადან” გაუჩინარდა, ურეკში იპოვეს. ამის შესახებ შსს-ს საზოგადოებასთან ურთიერთობის ხელმძღვანელი თეა პერტაია “ფეისბუქის” გვერდზე წერს.
“დაკარგული ლევან მ. პოლიციამ ურეკში იპოვა და ის თავს კარგად გრძნობს “, – წერს პერტაია.
ლევან მამაგეიშვილს ოჯახის წევრები ეძებდნენ. როგორც დაკარგულის დედა ამბობდა მისი კვალი თბილისში, ავტოსადგურ ოკრიბას ტერიტორიაზე იკარგებოდა.
ლევან მამაგეიშვილი დასთან ერთად ავტომანქანის საყიდლად იყო ჩამოსული და თან 23 ათასი დოლარი ჰქონდა. მისი დის თქმით, რუსთავში ავტობაზრობაზე წასვლამდე ისინი “ოკრიბას” სადგურზე მდებარე ერთ-ერთ კაფეში გაჩერდნენ, რა დროსაც ლევან მამაგეიშვილი რამდენიმე წუთით საპირფარეშოში გავიდა, თუმცა მას შემდეგ ის აღარავის უნახავს.
ოჯახი ვარაუდობდა, რომ მას შეამჩნიეს, რომ ფული ჰქონდა და გაიტაცეს, რადგან თანხა სპორტული შარვლის ჯიბეში ედო და ემჩნეოდა, რომ დიდი ოდენობით თანხა იყო. ინფორმაციას ტელეკომპანია “იბერია”-ს “ახალი ამბები” ავრცელებს.