საჩხერის გამგებლის მოადგილე ელგიზ ქიმაძე ემოციურ პოსტს აქვეყნებს. პოსტი გუშინ დაკარგულ 7 წლის ბიჭუნას ეხება, რომელიც საჩხერის ტყეში მალულად წავიდა და ერთი დღე დაკარგული იყო.
“უშედეგო ძებნას ემატებოდა ის, რომ სოფელში საღამოს მოვიდა ძლიერი წვიმა. მთელი ღამის ძებნამ შედეგი არ გამოიღო, ერთადერთ იმედად გვრჩებოდა ბავშვის მეგობარი პატარა ძაღლი სახელად ,,მურა”, რომელიც ბავშვს თან ახლდა და არც ის ჩანდა. ამ დილით ყველანი სოფელში ვიყავით, როცა ერთ–ერთმა იქაურმა დაიძახა ლუკას ძაღლი გამოჩნდაო და მართლაც დავინახეთ ძაღლი ,,გახარებული” გამორბოდა, ვინაიდან გაიაზრა, რომ ლუკა საიმედო ხელს ეჭირა. ძაღლის გამოჩენას მოჰყვა კაცი, რომელსაც უვნებელი ბავშვი ხელში ჰყავდა და სახლისკენ მოჰყავდა. ყველანი, ვინც იქ ვიყავით ცრემლებს ვერ ვიკავებდით, საბედნიეროდ ეს სიხარულის ცრემლები იყო.როგორც ბავშვმა მოყვა, ლუკას ტყეში ძალიან სციოდა და ეშინოდა, თუმცა ის ძაღლზე იყო ჩახუტებული და ის ათბობდა,”- წერს საჩხერის გამგებლის მოადგილე ელგიზ ქიმაძე სოციალურ ქსელში.”