საერთაშორისო უსაფრთხოების სამართლის დოქტორმა, გიგა ლემონჯავამ კავკასიის საერთაშორისო უნივერსიტეტში, “ახალი ამბების ჟურნალისტიკის“ საგნის ფარგლებში, წაიკითხა ღია ლექცია თემაზე “რუსეთის სამხედრო აგრესია უკრაინაში და რუსეთის საინფორმაციო პროპაგანდა”. შეხვედრა ინტერაქციულ რეჟიმში წარიმართა და სტუდენტებს მათთვის საინტერესო კითხვების დასმის შესაძლებლობაც მიეცათ.
გიგა ლემონჯავას შეფასებით, შეხვედრა წარმატებით ჩატარდა და აუდიტორიამ, აღნიშნული საკითხის მიმართ, ინტერესი გამოავლინა.
“ჩვენ ვისაუბრეთ ანტიდასავლური პროპაგანდის სხვადასხვა ასპექტზე, ისტორიულ წიაღსვლებზე, დღევანდელობაზე, რუსეთის სამხედრო აგრესიაზე და, ამ სამხედრო აგრესიის კვალდაკვალ, რუსეთის ანტიდასავლურ პროპაგანდაზე უკრაინაში. ჩემი აზრით, გადამწყვეტი მნიშვნელობა აქვს იმას, რომ სწორედ სტუდენტებს ვესაუბროთ ამ თემებზე, რადგან ის, რაც ჩვენ შეგვიძლია რუსულ პროპაგანდას დავუპირისპიროთ, განათლება, მეტი კომპეტენტურობა და უფრო მაღალი ჟურნალისტური სტანდარტებია. ამიტომაც, ამ სტუდენტების დღეიდან მომზადება ძალიან მნიშვნელოვანია. ანტიდასავლური პროპაგანდა რუსეთის მხრიდან უახლოეს მომავალში არ დამთავრდება და ათწელულის მთავარი გამოწვევაც იქნება ცივილიზებული მსოფლიოსთვის და რა თქმა უნდა, საქართველოსთვისაც”,-განაცხადა ლემონჯავამ.
კავკასიის საერთაშორისო უნივერსიტეტის სტუდენტმა, თამუნა შაქარაშვილმა ლექციის მიმდინარეობის პროცესი დადებითად შეაფასა და აღნიშნა, რომ დამსწრე აუდიტორიამ მომხსენებლისგან სასურველ კითხვებზე პასუხებიც მიიღო.
“დღეს დავესწარით ძალიან მნიშვნელოვან შეხვედრას. ჩვენ განვიხილეთ რუსეთისა და უკრაინის მაგალითი და ასევე, შევძელით ჩვენს ქვეყანასთან პარალელის გავლება. შთამბეჭდავი იყო ისიც, რომ პრეზენტატორმა შეძლო აუდიტორიის დაინტერესება, კომუნიკაციის დამყარება და კითხვა-პასუხის რეჟიმში ამომწურავი პასუხების გაცემა”,- განმარტა თამუნა შაქარაშვილმა.