ფილოლოგიის დოქტორი, ექსპერტი განათლების საკითხებში გია მურღულია სოციალურ ქსელში შემდეგი სახის პოსტს აქვეყნებს:
„1. ზვიად რატიანი კარგი პოეტია. 2. მას აქვს უფლება, იცხოვროს ისე, როგორც საჭიროდ მიაჩნია. 3. ამავე განზომილებაში მას აქვს უფლება დათვრეს, როდესაც და სადაც მოეხასიათება. 4. მას აქვს უფლება გაბრაზდეს ნებისმიერ წამს. 5. მას არ აქვს უფლება აგინოს პოლიციას – არც ერთი სტატუსი არ იძლევა ამ უფლებას უპირობოდ ან შეკოწიწებული უფლებით. 6. ამ გინების გამო პოლიციას არ აქვს უფლება ცემოს ზვიად რატიანი ან ვინმე სხვა. 7. „საზოგადოებრივ მაუწყებელს” აქვს უფლება და კიდევ უფრო მეტი ვალდებულება, მოგვაწოდოს ინფორმაცია განსასჯელად. 8. კანონი ყველასთვის თანაბრად უნდა კანონობდეს – პრივილეგიები არ არსებობს. 9. თუ რატიანი აცნობიერებს და აცხადებს, რომ რამდენადმე სამარცხვინოდ მოიქცა ზედმეტი სიმთვრალისას, აუცილებელი არ არის მასზე მეტი რომის პაპი იყოს ვინმე. 10. თუ შინაგან საქმეთა სამინისტრო აცხადებს, რომ დასჯის პოლიციელებს, რომლებმაც უფლებამოსილებას გადააჭარბეს, არ არის აუცილებელი, უკიდურესი უნდობლობა გამოვაცხადოთ. 11. ზემოთქმულის გათვალისწინებით, ასევე, არ არის გამაოგნებლად საჭირო, საზოგადოებრივ მაუწყებელს ვაგინოთ – თუ ინფორმაცია შეურაცხყოფას გვაყენებს, ზოგჯერ მაინც საკუთარ თავს მოვკითხოთ და არა ინფორმაციას. პირველი არხი სწორად მოიქცა და მე, როგორც ერთი მოქალაქე, მას თანადგომას ვუცხადებ. 12. ვინმეს თუ განსხვავებული აზრი აქვს, ჰქონდეს – მე არ ვარ ვალდებული, მაინცდამაინც ამ ვინმეს აზრს ვიზიარებდე.
P.S. მარტივი ამბავია: სახელმწიფომ ერთმნიშვნელოვნად უნდა დაიცვას ადამიანის უფლებები და არც მოქალაქემ უნდა დაივიწყოს კანონები და ქცევის წესები”, – წერს მურღულია.