თბილისში, ეუთო-ს საპარლამენტო ასამბლეის 25-ე სესიაზე, შვეიცარიის დელეგაციას წარმოდგენილი აქვს რეკომენდაცია, რომლის მიხედვითაც, რუსეთის დუმის 20 დეპუტატს, რომლებსაც ევროკავშირის წევრ ქვეყნებში გადაადგილება არ შეუძლიათ, ეს სანქცია მოეხსნათ. საუბარია არა ზოგადად სანქციების მოხსნასზე, არამედ კონკრეტულად დეპუტატებზე.
უკრაინული დელეგაციის წარმომადგენლის ანტონ გერაშენკოს განცხადებით, უკრაინული დელეგაცია მოითხოვს, რომ რუსეთის სახელმწიფო დუმის 20 დეპუტატს ევროკავშირში ჩასვლაზე მოქმედი შეზღუდვა გაუხანგრძლივდეს.
„თუ ეუთო-ს სამიტზე მიიღებენ გადაწყვეტილებას სანქციების მოხსნის რეკომენდაციის შესახებ, ეს იქნება უკრაინის ტერიტორიული მთლიანობისა და დამოუკიდებლობის დაცვის პრინციპებზე უარის თქმა. ამიტომ ჩვენ რუსეთის წინააღმდეგ სანქციების მოხსნის წინააღმდეგი ვართ. ვფიქრობ, რუსეთს შვეიცარიის კონფედერაციის ტერიტორიის ნაწილი რომ დაეპყრო, რუსი დეპუტატების წინააღმდეგ სანქციების მოხსნის სურვილი არ ექნებოდათ“, – განაცხადა ანტონ გერაშენკომ.
მისი თქმით, ამჟამად ეუთო-ს საპარლამენტო ასამბლეის სესიაში მონაწილეობს დსთ-ს საკითხებში რუსეთის სახელმწიფო დუმის კომიტეტის თავმჯდომარე ლეონიდ სლუცკი, რადგან თბილისი რუსეთის წინააღმდეგ დაწესებულ სანქციებს არ შეუერთდა. ლეონიდ სლუცკის ევროკავშირის ტერიტორიაზე ჩასვლა აკრძალული აქვს.