დღეს, ხორავას ქუჩაზე არასრულწლოვნების მკვლელობის საქმის შემსწავლელი საპარლამენტო კომისიის მორიგი სხდომა გაიმართა. საგამოძიებო კომისიის ფორმატი შეაფასა ჟურნალისტმა მერაბ მეტრეველმა და აღნიშნა, რომ თავის დროზე გირგვლიანის საქმეზეც რომ შექმნილიყო ასეთი კომისია, “ნაციონალური მოძრაობა” დღეს გაცილებით უკეთეს მდგომარეობაში იქნებოდა, ვიდრე არის.
“მაგრად მომწონს ეს საგამოძიებო კომისიის ფორმატი. ასე მგონია, ამერიკის კონგრესს ვუყურებ. თავის დროზე გირგვლიანის საქმეზეც რომ შეექმნათ ასეთი კომისია, დღეს “ნაცების” საქმე გაცილებით უკეთ იქნებიდა”, – წერს მეტრეველი სოციალურ ქსელში.
ხორავას ქუჩის საქმეზე შექმნილმა საგამოძიებო კომისიამ პარლამენტში პირველი სხდომა 8 ივნისს გამართა. სხდომის შინაარსი ტექნიკური ხასიათის იყო და კომისიის მუშაობის პრინციპების დაზუსტებით შემოიფარგლა.
6 მაისს პარლამენტის რიგგარეშე სხდომაზე, ხორავას ქუჩაზე მომხდარი ორი ახალგაზრდის მკვლელობის საქმის შემსწავლელი დროებით საგამოძიებო კომისია დაამტკიცეს. კომისიის არჩევას 95-მა დეპუტატმა დაუჭირა მხარი, წინააღმდეგი 1 იყო.
კომისიის შემადგენლობა 17 წევრით განისაზღვრა. უმრავლესობასა და უმცირესობას შორის შეთანხმებით, კვოტების მიხედვით, 9 ადგილი კომისიაში ეკუთვნის უმცირესობას – ევროპულ საქართველოს თავისი ფრაქციებით. კომისიის შემადგენლობაში არ არის “ერთიანი ნაციონალური მოძრაობა”. კომისიას სერგი კაპანაძე ხელმძღვანელობს.