ევროპული სამეზობლო პოლიტიკისა და გაწევრიანების შესახებ მოლაპარაკებების საკითხებში ევროკომისარი იოჰანეს ჰანი იმედოვნებს, რომ საქართველოს ვიზალიბერალიზაციის პროცესი ოქტომბერში დასრულდება. ამის შესახებ იოჰანეს ჰანმა ბათუმში მიმდინარე კონფერენციაზე «საქართველოს ევროპული გზა» სიტყვით გამოსვლისას განაცხადა.
«მე ვაცნობიერებ, რომ ვიზალიბერალიზაცია მთავრობისთვის მთავარ პრიორიტეტად რჩება. საქართველომ შეასრულა ვიზალიბერალიზაციის სამოქმედო გეგმით გათვალისწინებული ყველა ვალდებულება, რაც ევროკომისიამ დაადასტურა გასული წლის დეკემბერში. ეს ნამდვილად დიდი წარმატებაა და საქართველოს შესაბამისი მმართველობისა და ადმინისტრირებაში გატარებული რეფორმების დამსახურებაა. ვიზალიბერალიზაციის სამოქმედო გეგმის შესრულება იყო ეროვნული პრიორიტეტი, რომელსაც ქვეყანაში ყველა ძირითადი პოლიტკური პარტია უჭერდა მხარს. ევროკავშირი მხარს უჭერს აღმოსავლეთ პარტნიორობის ქვეყნებთან ადამიანებს შორის ურთიერთობების ხელშეწყობას, რასაც პირდაპირი შედეგი ექნება ეკონომიკაზე, კულტურაზე. მე მოუთმენლად ველი, როდის შეძლებენ საქართველოს მოქალაქეები ევროკავშირში უვიზოდ მოგზაურობას. მჯერა, რომ ამ დღისგან ჩვენ დიდი დრო არ გვაშორებს. მსურს დაგარწმუნოთ, რომ ეს პროცესი მიმდინარე წლის ოქტომბერში დასრულდება», – განაცხადა იოჰანეს ჰანმა.