ჩვენ დიდი მადლობა გადავუხადეთ კომისარ ჰანს მისი პირადი წვლილისთვის ვიზალიბერალიზაციის საკითხში და ეს ძალიან მნიშვნელოვანი ნაბიჯებია, რომელსაც საქართველო დგამს ამ მიმართულებით, – ამის შესახებ საქართველოს პრემიერ მინისტრმა, გიორგი კვირიკაშვილმა ბათუმში მიმდინარე კონფერენციის – „საქართველოს ევროპული გზა“ მიმდინერობისას ჟურნალისტებთან კომენტარის დროს აღნიშნა.
როგორც გიორგი კვირიკაშვილმა განმარტა, „კომისარმა თავის გამოსვლაში ახსენა, რომ საქართველო აუცილებლად შემოდგომაზე მიიღებს ვიზალიბერალიზაციას“.
“ფორუმის ფარგლებში იგეგმება ძალიან საინტერესო დისკუსიები ევროპის სამეზობლო პოლიტიკის, აღმოსავლეთ პარტნიორობის შესახებ და საქართველოს ევროპული ინტეგრაციის საკითხებზე. ჩვენთვის ევროპული ინტეგრაცია და ის რეფორმები, რომლებიც გამომდინარეობენ ასოცირების ხელშეკრულებიდან არის ძალიან მნიშვნელოვანი, უმაღლესი პრიორიტეტი და ჩვენ ნაბიჯ-ნაბიჯ წარმატებულად მივყვებით ამ გზებს და ვახორციელებთ მნიშვნელოვან რეფორმებს. ასევე მნიშვნელოვანია და კომისარმა ჰანმა გაუსვა ხაზი თავის გამოსვლაში თუ რაოდენ მნიშვნელოვანია ეკონომიკური პარტნიორობა ევროკავშირის ქვეყნებთან ვინაიდან, ეკონომიკური განვითარება და ეკონომიკური პარტნიორობის განვითარება ქმნის უფრო მეტ სტაბილურობას რეგიონში და ეს არის ასახული ევროპის ახალ სამეზობლო პოლიტიკაში. ასევე, ჩვენი საუბრის დროს განვიხილეთ ახალი ინიციატივები, როგორიც არის მაგალითად ევროპული სკოლის დაარსება საქართველოში, რომელიც იქნება რეგიონული ხასიათის და ჩვენ დიდი მადლობა გვინდა გადავუხადოთ ამ ინიციატივისთვის და მზად ვართ ამ პროექტის ფარგლებში თანამშრომლობისთვის“, – აღნიშნა გიორგი კვირიკაშვილმა. მე-13 საერთაშორისო კონფერენცია ევროპული და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის ორგანიზებით ტარდება.