შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა ქეთევან ციხელაშვილმა სოფელ ბობნევიდან გატაცებული მაია ოთინაშვილის ოჯახის წევრებს მის ხელთ არსებული ბოლო ინფორმაცია გააცნო.
სახელმწიფო მინისტრის თქმით, მთელი ძალისხმევა მობილიზებულია, რათა მისი გათავისუფლება მოხერხდეს.
„დღის განმავლობაში ცხელი ხაზი რამდენჯერმე გააქტიურდა და კვლავ იგეგმება. ამიტომ გარკვეული ინფორმაციის მოლოდინია. ბოლოს ცხელი ხაზი დაახლოებით ერთი საათის წინ გააქტიურდა და ვიცით, რომ მისი მდგომარეობა დამაკმაყოფილებელია. პროცესში ჩართულია წითელი ჯვრის საერთაშორისო კომიტეტი და ისინი ოჯახის წევრებთან ხაზზე არიან. მათი ჩართულობა ძალიან მნიშვნელოვანია.
„ბოლო ინფორმაციით, მომდევნო ორი დღის განმავლობაში დაგეგმილია ის ე.წ. პროცედურებიც, რომლებიც უკანონო დაკავებების შემთხვევაში ხდება ხოლმე. სხვა ტიპის გადაწყვეტილება არ დასტურდება. ამ ყველაფერში ძალიან აქტიურადაა ჩართული ევროკავშირის სადამკვირვებლო მისიაც. ინფორმაცია აქვთ ჟენევის დისკუსიების თანათავმჯდომარეებსაც. ყველა არხი, რაც ასეთ ვითარებაში ჩვენს ხელთაა, გააქტიურებულია“, – განაცხადა ქეთევან ციხელაშვილმა.
აღნიშნულ ინფორმაციას უწყების პრესსამსახური ავრცელებს.