„ევროპული საქართველო“ და „ნაციონალური მოძრაობა“ ერთი გამხმარი ხის ორი ტოტია, – ამის შესახებ პარტია „ქართული ოცნება – დემოკრატიული საქართველოს“ გენერალურმა მდივანმა, დედაქალაქის მერმა კახა კალაძემ განაცხადა.
კახა კალაძეს ჟურნალისტებმა „ევროპულ საქართველოს“ ეგზიტპოლის შედეგებთან დაკავშირებით ჰკითხეს: – „ევროპულმა საქართველომ“ გამოაქვეყნა ეგზიტპოლის შედეგები, რომლის მიხედვითაც გრიგოლ ვაშაძე ლიდერობს, შემდეგი არის სალომე ზურაბიშვილი, ასეთ ფონზე, რამდენად სანდოა თქვენი დაკვეთით ჩატარებული კვლევა და რატომ არის შედეგებში ამხელა სხვაობა“, რაზეც მან უპასუხა:
„გამიჭირდება პასუხი გაგცეთ მათ მიერ ჩატარებულ ეგზიტპოლის შედეგებზე. უბრალოდ ვიტყოდი, რომ თუ გადავხედავთ წლების განმავლობაში ამ პარტიის მიერ გამოქვეყნებულ ეგზიტპოლებს, საარჩევნო კვლევებს, რეალური შედეგი ყოველთვის დგებოდა სხვა. შესაბამისად, ჩვენ შეგვიძლია ვთქვათ და ვივარაუდოთ, რომ ეს არის გაყალბებული, იმის გათვალისწინებით, რომ წლების განმავლობაში, ყოველთვის არჩევნების პროცესში წარმოდგენილი კვლევებისა და ეგზიტპოლის შედეგებისგანგანსხვავებული იყო საბოლოო შედეგი, გადაწყვეტილება, რასაც ხალხი იღებდა. ანუ ეს ორივე პარტია წარმოადგენს ერთ დიდ „ნაციონალურ მოძრაობას“, უხეშად რომ არ გამომივიდეს და ყველასთვის გასაგები რომ იყოს, ერთი გამხმარი ხის ორი ტოტია“, – განაცხადა კახა კალაძემ.