გრიგოლ ვაშაძე: მიხეილ სააკაშვილს უნდა ჰქონდეს უფლება, რომ საქართველოში იცხოვროს

გაერთიანებული ოპოზიციის – „ძალა ერთობაშია” საპრეზიდენტო კანდიდატი გრიგოლ ვაშაძე „დოიჩე ველესთვის” მიცემულ ინტერვიუში ამბობს, რომ მიხეილ სააკაშვილმა საქართველოს მოქალაქეობა უნდა დაიბრუნოს.
მისივე თქმით, სამართალდამცავ ორგანოებს ან სასამართლო სისტემას თუ აქვს კითხვები, სააკაშვილმა უნდა უპასუხოს.
„მას უნდა ჰქონდეს უფლება, იცხოვროს საქართველოში, მან უნდა დაიბრუნოს საქართველოს მოქალაქეობა. თუ სამართალდამცავ ორგანოებს ან სასამართლო სისტემას აქვთ მასთან კითხვები, მან უნდა უპასუხოს. მას თუ უნდა, აქ ააშენოს თავისი პოლიტიკური მომავალი, მაშინ გადაწყვეტილება ქართველმა ხალხმა უნდა მიიღოს”, – განაცხადა ვაშაძემ.
კითხვაზე, პრეზიდენტი თუ გახდა, დაუბრუნებს თუ არა სააკაშვილს მოქალაქეობას? ვაშაძე პასუხობს, რომ დაუბრუნებს და შეიწყალებს.
“მე არ ვაპირებ, შევიწყალო მარტო ის, მე შევიწყალებ ყველა პოლიტპატიმარს და გთხოვთ, ეს არ გამოტოვოთ, იმიტომ, რომ ზოგიერთი ქართული არხი ეთერიდან ჭრის ამ მეორე ფრაზას. მე შევიწყალებ პრეზიდენტ სააკაშვილს, მე შევიწყალებ ყველა პოლიტპატიმარს, მე შევიწყალებ ყველა პატიმარ ქალს, რომლებსაც ექსტრაორდინალური დანაშაული არ ჩაუდენიათ და რომლებსაც შვილები ჰყავთ. მე ვაპირებ, ეს ძალიან სწრაფად გავაკეთო. დაახლოებით, მოსვლიდან ორი-სამი თვის განმავლობაში, იმიტომ, რომ მე ვიცი, რაც ხდება ციხეებში”, – განაცხადა გრიგოლ ვაშაძემ.