მინდა მივმართო ჯარისკაცებს, არანაირი ჰააგის სასამართლო თქვენ არ გემუქრებათ,- ამის შესახებ საპარლამენტო უმრავლესობის ლიდერმა, არჩილ თალაკვაძემ განაცხადა. ჟურნალისტების კითხვაზე, არის თუ არა შესაძლებლობა, რომ ხელისუფლების წარმომადგენლები, ან მმართველი გუნდის მიერ მხარდაჭერილი საპრეზიდენტო კანდიდატი დაიბარონ ჰააგაში დაკითხვაზე, თალაკვაძე აცხადებს: „როგორც საქართველოში, ისე ჰააგაში, ვაშინგტონსა და ლონდონში, საქართველოს ხელისუფლების ყველა წარმომადგენელს ექნება პოზიცია, რომელიც ქვეყანას სჭირდება და ასახავს სიმართლეს, რაც არის ჩვენსკენ“. მისი თქმით, იუსტიციის სამინისტრო ყველანაირად ცდილობს, რომ საქართველოს სიმართლე იყოს დამტკიცებული.
„ჰააგის სასამართლოში ბრძოლა სიმართლისთვის სწორედ ჩვენი ხელისუფლების პირობებში გააქტიურდა. მინდა შევახსენო ყოფილ ხელისუფლებას და სალომე სამადაშვილს, რომ მტკიცებულებები, მათ შორის ბომბების ფრაგმენტები, რომელიც ჩვენი მოსახლეობის წინააღმდეგ იქნა გამოყენებული, სწორედ თეა წულუკიანის ხელმძღვანელობით იქნა შეკრებილი, ჩატარდა ექსპერტიზები და გაიგზავნა გამოძიებისთვის. მათ დროს უყურადღებოდ იყო დატოვებული ძირითადი მტკიცებულებები, რომლებსაც შეეძლო საქმის მოგება. ამის სისტემატიზება მოხდა ჩვენი ხელისუფლების პირობებში. ჩვენ ვაგრძელებთ ბრძოლას ჰააგის სასამართლოში იმ სიმართლისთის, რომელიც არის ჩვენს მხარეს.
მეორე მხრივ, ჩვენ ვხედავთ „ნაციონალური მოძრაობის“ სრულიად უპასუხისმგებლო და უსირცხვილო განცხადებებს, რომ ისინი ცდილობენ ჯარის და ჯარისკაცების განწყობები საკუთარი პარტიის ინტერესების დასაცავად გამოიყენონ. მინდა, მივმართო ჯარისკაცებს, არანაირი ჰააგის სასამართლო თქვენ არ გემუქრებათ, არანაირი პასუხისმგებლობა არ არის თქვენთან შეხებაში. გააგრძელეთ და დიაცავით თქვენი სამშობლო. თქვენ ხართ გმირები. ის, რასაც ტელევიზიით ამბობენ, რომ თითქოს ჰააგის სასამართლოში საქართველო წააგებს და ამით რაიმე დაემუქრება რომელიმე ჯარისკაცს, ეს არის სიცრუე. მე მოვისმინე ტყუილი, თითქოს ჰააგის სასამართლოში პროცესი შეწყვეტილია – ეს არის ტყუილი. ეს პროცესი მიდის წინ, მტკიცებულებები, რომელმაც საქმეში გარდატეხა შეიტანა, ჩვენი ხელისუფლების მიერ არის წარდგენილი. აუცილებლად ბოლომდე მივიყვანთ ამ პროცესს მიუხედავად იმისა, რომ „ნაციონალური მოძრაობა“ ყველანაირად ცდილობს ხელი შეუშალოს საქართველოს ინტერესებს და გამოიყენოს ეს საკითხი პარტიული მიზნებისთვის“, – განაცხადა თალაკვაძემ.