ირაკლი შიხიაშვილი ამომრჩეველს ე.წ. “ხრუშჩოვკების“ პრობლემების გადაჭრას ჰპირდება

სამგორის მაჟორიტარი დეპუტატობის კანდიდატი ირაკლი შიხიაშვილი საკუთარ ამომრჩეველს. ე.წ. „ხრუშჩოვკების“ პრობლემების გადაჭრას ჰპირდება.
როგორ „კვირაში“ გამართულ პრესკონფერენციაზე ირაკლი შიხიაშვილმა განაცხადა, ამ პრობლემის მოგვარებაზე ზრუნვა მან ჯერ კიდევ თბილისის საკრებულოს თავმჯდომარეობის დროს დაიწყო, თუმცა „ნაციონალური მოძრაობის“ ლიდერებმა ამის განხორციელების საშუალება არ მისცეს.
„სამგორისთვის სპეციფიკურად მნიშვნელოვანია ე.წ. „ხრუშჩოვკების“ პრობლემა. ამ საკითხზე ზრუნვა საკრებულოში ინტენსიურად დავიწყეთ, გავაკეთეთ გარკვეული ტექნიკურ-ეკონომიკური კვლევა, თუ როგორ უნდა განხორციელებულიყო ეს მესამე მასივში. მას შემდეგ, რაც საკრებულოდან წამოვედი, ეს საქმე დიდი ინტენსივობით გააგრძელა მამუკა ჩოქურმა სამგორის რაიონში. ახლა ვაპირებთ, მოსახლეობას გავაგებინოთ და ვაჩვენოთ კონკრეტული მოდელი, ხედვა და პრობლემის გადაჭრის საშუალებები, ასევე დაფინანსების წყარო და ყველა მიმართულება, თუ როგორ არის შესაძლებელი ამ პრობლემის გადაჭრა“, – განაცხადა ირაკლი შიხიაშვილმა.
მისი თქმით, აღნიშნული პრობლემის გამო, ქვეყანაში შეიძლება 110 ათასი ოჯახი დარჩეს უსახლკაროდ.
„ჩემი საკრებულოში მუშაობის პერიოდში, 4 მილიონ ნახევრამდე ლარს ხარჯავდა ქალაქი თავის ბიუჯეტიდან იმისთვის, რომ ქირით გამოყვანილი ადამიანების ქირის ანაზღაურება მოეხდინა და დღეს ეს თანხა 7 მილიონს გადასცდა, ხვალ – 14 მილიონს გადასცდება და დაუსრულებლად ადამიანებს სახელმწიფო ბიუჯეტიდან ქირაში ფული უხადო. თან ქირის საფასური იზრდება, რადგან ბინაზე მოთხოვნა რომ იზრდება, გამქირავებელი საფასურს უმატებს. ჩვენი მზიანია, ამ ფულის გადახდა შეწყდეს. გვაქვს კონკრეტული ხედვა და ცოდნა, გამოსავალი, როგორ უნდა განხორციელდეს. რაც მალე დავიწყებთ, მით მალე მივიღებთ ნორმალურ პირობებში მცხოვრებ საზოგადოებას,“ – განაცხადა ირაკლი შიხიაშვილმა.
მისივე თქმით, მაჟორიტარ დეპუტატად არჩევის შემთხვევაში, მთავარი საზრუნავი და პრიორიტეტი იქნება ასევე სოციალური და ჯანდაცვასთან დაკავშირებული საკითხების გადაწყვეტაში მონაწილეობა, რომლის შესახებ საკუთარი ხედვა და მოსაზრებები გააჩნია.