ბუტა რობაქიძის დედამ ია მეტრეველმა პრესკონფერენცია გამართა და ბუტა რობაქიძის საქმის დეტალებზე ისაუბრა. მისი თქმით, ძალიან ბევრი ადამიანი ელოდება საქართველოში სამართლიანობის დადგომას.
„ჩემთვის მთავარი იყო საზოგადოება დარწმუნებულიყო იმაში, რომ ჩემი შვილი აბსოლუტურად უდანაშაულო იყო. დამნაშავეებს უნდოდათ ეს ყველაფერი იმ ბიჭებისთვის გადაებრალებინათ, რომლებიც ბანდიტებად გამოაცხადეს. ამ ბავშვების უდანაშაულობა რომ დამტკიცდა, ეს იყო მნიშვნელოვანი. ამით არ დასრულებულა ეს საქმე. სახელმწიფოში იყო დამკვიდრებული ბოროტი სისტემა, რომელიც სააკაშვილმა შექმნა. ამ საქმეში მთლიანი სახელმწიფო მანქანა იყო ჩართული თავის მაღალჩინოსნებით. უკვე დაწებულია მეორე – მაღალჩინოსნების საქმე, რომელშიც შედიან, როგორც ოქრუაშვილი, ასევე სხვა მაღალჩინოსნები, ანუ ვინც გასცა ბრძანება.
მე გუშინ მოვითხოვე ბატონი გახარიასგან, რომ აუცილებლად უნდა დაინტერესდნენ ამ პატრულებით და ისინი არ უნდა მუშაობდნენ ძალოვან სტრუქტურებში. ისინი დღესაც განაგრძობენ ადგილებზე მუშაობას და ზოგიერთი დაწინაურებულიც არის.
როგორც ჩემამდე მოვიდა ინფორმაცია, სააკაშვილმა და ოქრუაშვილმა ერთად გასცეს ბრძანება, რომ პატრული არაფრით არ უნდა დაზარებულიყო და პატრულის იმიჯი არ უნდა შელახულიყო, რადგან სააკაშვილის საამაყო რეფორმა იყო სწორედ პატრული. პირველივე დღიდან ყველაზე დიდ დამნაშავედ მიხეილ სააკაშვილი მიმაჩნია, რადგან მან გასცა ბრძანება ნულოვანი ტოლერანტობის შესახებ. ის არის თავი ყველა იმ უბედურების, რაც ჩვენს ქვეყანაში დატრიალდა და დღემდე გრძელდება. ის არის ყველა გეგმის ავტორი. დღესაც კარგად ვისმენდით, როგორ მოუწოდებს სახელმწიფო გადატრიალებისკენ. ის არის ძალიან დიდი ბოროტება, მან შექმნა ის სისტემა“, – განაცხადა ია მეტრეველმა.