“ლაბორატორიულად დასტურდება H1n1-ით გარდაცვალების 6 შემთხვევა”

ლაბორატორიულად დასტურდება H1n1-ით გარდაცვალების 6 შემთხვევა, – ამის შესახებ დაავადებათა კონტროლის ეროვნული ცენტრის გენერალურმა დირექტორმა, ამირან გამყრელიძემ განაცხადა.
მისივე თქმით, წელს, წინა წლებთან შედარებით, გრიპის ვირუსით დაავადებულთა მდგომარეობა შედარებით რთულია.
„წელს ცირკულირებს ა გრიპის შტამი H1N1, რომელიც მეტი აგრესიულობით ხასიათდება. ამიტომ, წელს გრიპისა და გრიპის მსგავსი სიმპტომებით მიმართვიანობა ამბულატორიებსა და კლინიკებში მომატებულია. ასევე გაზრდილია გართულებების შემთხვევები, რომელიც საჭიროებს სტაციონარულ მკურნალობას. ბოლო სამი კვირის განმავლობაში მიმართვიანობის ზრდა ფიქსირდება. ლაბორატორიულად დასტურდება H1n1-ით გარდაცვალების 6 შემთხვევა. მომატებული ტემპერატურისა და გრიპის სიმპტომების შემთხვევაში, როგორიცაა ხველა, თავის ტკივილი, სურდო, შემცივნება, რეკომენდებულია პაციენტებმა მიმართონ ექიმს. გასული ორშაბათის ინფორმაციით, გრიპის ან მსგავსი ტიპის ვირუსის გავრცელების მაჩვენებელი ქვეყანაში 100 000 კაცზე 277-ია, რაც ეპიდემიის ზღვარს არ სცდება. განსაკუთრებით მოწყვლადი ჯგუფებია ბავშვები, მოხუცები, ორსულები და ქრონიკული დაავადების მქონე პაციენტები“,-განაცხადა ამირან გამყრელიძემ.