თბილისში პატრულ-ინსპექტორი ზაზა კახნიაშვილი დაჭრეს. შემთხვევა 7 იანვარს, შობას, თბილისის ზღვის მიმდებარედ მოხდა.
ფაქტს შსს ადასტურებს, თუმცა არ კონკრეტდება, თუ რა ვითარებაში მოხდა დაჭრა. პატრულ-ინსპექტორი ამჟამად საავადმყოფოში მკურნალობს. ექიმების ინფორმაციით, მისი მდგომარეობა სტაბილურია, თუმცა, ყურადღებას საჭიროებს. ის რეანიმაციულ განყოფილებაში, მართვით სუნთქვაზე იმყოფება. ექიმები არ აკონკრეტებენ, დაჭრის ფაქტი მოხდა თუ არა სამსახურეობრივ უფლებამოსილების შესრულების დროს, ანუ საავადმყოფოში შეყვანისას, იმყოფებოდა თუ არა პატრულის ფორმაში. ექიმების ინფორმაციით, ნაფლეთი ჭრილობა იარაღით აქვს მიყენებული.
”შინაგან საქმეთა სამინისტროს ქალაქ თბილისის პოლიციის დეპარტამენტის გლდანი-ნაძალადევის სამმართველოში, თბილისის ზღვის ტერიტორიაზე 7 იანვარს მომხდარ დაჭრის ფაქტზე გამოძიება მიმდინარეობს.
საპატრულო პოლიციის დეპარტამენტის თანამშრომლის სხეულის დაზიანების ფაქტზე გამოძიება სისხლის სამართლის კოდექსის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს. პატრულ-ინსპექტორი საავადმყოფოში მკურნალობს, მისი ჯანმრთელობის მდგომარეობა, ექიმების შეფასებით, სტაბილურია.
მომხდარ ფაქტზე სამართალდამცველები ინტენსიურ რეჟიმში ატარებენ ოპერატიულ-საგამოძიებო ღონისძიებებს”, – აცხადებენ უწყებაში.