რუსთავ-თბილისის სამარშრუტო ტაქსის მძღოლები სპეციალური კომისიის შექმნას მოითხოვენ, რომელიც მგზავრობის რეალურ ფასს განსაზღვრავს. მათი აზრით, სამუშაო ჯგუფში საკრებულოს წევრები და არასამთავრობო ორგანიზაციები უნდა ჩაერთონ.
დღეს სამარშრუტო ტაქსების მძღოლებმა და ტრანსპორტის პროფკავშირებმა განაცხადეს, რომ 1 თებერვლამდე რუსთავი-თბილისის მიმართულებით მგზავრობა ისევ 1.50 ლარად იქნება შესაძლებელი. მძღოლები ამბობენ, რომ თუ რუსთავის მერია სამუშაო ჯგუფის შექმნას და მგზავრობის საფასურის დადგენაზე ექსპერტების ჩართულობას არ დათანხმდება, აქციებს გააგრძელებენ.
რუსთავსა და თბილისს შორის მიკროავტობუსით მიმოსვლა 50 თეთრით 29 დეკემბერს გაძვირდა და 2 ლარი გახდა. მას შემდეგ არაერთი აქცია გამართეს მძღოლებმაც და მოქალაქეებმაც. ამ საკითხმა რუსთავის საკრებულოს ერთ-ერთ სხდომაზე ხმაურიც გამოიწვია.