1 იანვრიდან დღემდე ინფექციურმა საავადმყოფომ წითელათი დაავადებული 60-ზე მეტი პაციენტი მიიღო. მათი უმრავლესობა 20-დან 40 წლამდეა. ამის შესახებ ინფორმაციას 1tv.ge ავრცელებს.
ინფექციური საავადმყოფოს სამედიცინო დირექტორის მარიან ეზუგბაიას თქმით, ამ ეტაპზე წითელას მომეტებული რაოდენობაა.
“მხოლოდ ჩვენი სტაციონარი იღებს წითელათი ინფიცირებულებს, ამისთვის ორი განყოფილება ფუნქციონირებს და შესაბამისად, გრიპით ინფიცირებულთა მიღება მეტ-ნაკლებად შეზღუდული გვაქვს. პირველი იანვრიდან დღემდე წითელათი 60 პაციენტზე მეტი მივიღეთ. პრევალირებს 20-40 წლამდე ასაკი, თუმცა არიან ბავშვებიც და მოზრდილებიც”, – განაცხადა ინფექციური საავადმყოფოს სამედიცინო დირექტორმა, მარინა ეზუგბაია.
ჯანდაცვის მსოფლიო ორგანიზაციის მონაცემებით, 2018 წლის პირველ 6 თვეში დაავადების 1000-ზე მეტი შემთხვევა გამოვლინდა. ამ მონაცემით საქართველო ევროპის იმ 7 ქვეყანას შორის, სადაც წელს წითელას შემთხვევები ყველაზე მეტად გაიზარდა, მესამე ადგილზეა. პირველ ადგილზე სერბეთია, მეორეზე უკრაინა.