რაც გუშინ ხაზარაძემ გახარიაზე თქვა, სერიოზული ბრალდებაა, რომელსაც მოკლე ვადებში სჭირდება დამტკიცება ან გამორიცხვა, – განაცხადა ჯანდაცვის მინისტრმა დავით სერგეენკომ „თიბისი ბანკის“ დამფუძნებლის მიერ გუშინ გაკეთებულ განცხადებაზე.
სერგეენკოს თქმით, საკითხი თავისი მასშტაბით და საზოგადოებრივი ინტერესიდან გამომდინარე აუცილებლად მოითხოვს გამჭირვალე და შედარებით მოკლე ვადებში განხილვას, რომ არცერთი კითხვა არ დარჩეს პასუხგაუცემელი.
„ის, რაც გუშინ ითქვა, არის ძალიან სერიოზული ბრალდება, რომელსაც, როგორც ნებისმიერ ბრალდებას, აუცილებლად სჭირდება დამტკიცება ან გამორიცხვა. დასკვნების წინასწარ გენერირება სწორი არ მგონია. რაც შეეხება გიორგი გახარიას, მას წლებია, ვიცნობ, სამსახურებრივადაც, მეგობრულადაც და პრაქტიკულად, გამოვრიცხავ, რომ მას ეს გაეკეთებინა. მარტო პროკურატურის ან პროკურორის ნებაზე არ არის დამოკიდებული ასეთი საქმის გამოძიება. ეს კომპლექსური პროცესია, მასში სხვადასხვა უწყება მონაწილეობს და ნამდვილად მჯერა, რომ გამოძიება იქნება ობიექტური და გამჭვირვალე“, – განაცხადა დავით სერგეენკომ.