შინაგან საქმეთა სამინისტრომ გლდანში „საქართველოს ბანკზე“ 2019 წლის 8 მარტს მომხდარი ყაჩაღური თავდასხმა გახსნილად გამოაცხადა. გახარიას უწყებამ ბრალდბეულის სახით ორი პირი დააკავა, ერთზე კი ძებნა გამოაცხადა.
მიუხედავად იმისა, რომ შსს ბრალდებულთა ვინაობას არ ახმაურებს „პრაიმტაიმისთვის“ ცნობილი გახდა, რომ დაკავებულები არიან 21 წლის ნიკა ქარსელაძე და 20 წლის დავით გამხუაშვილი.
ჩვენ ბრალდებულთა ფოტოებიც მოვიპოვეთ, სადაც ისინი ერთად არიან დაფიქსირებულნი.
მათ ბრალი ყაჩაღობის, პოლიციელზე თავდასხმის, იარაღის მართლსაწინააღმდეგო შეძენა-შენახვა-ტარებისა და თავისუფლების უკანონო აღკვეთის ბრალდებით წარუდგინეს, რაც საერთო ჯამში სასჯელის სახით 7-დან 10 წლამდე პატიმრობას ითვალისწინებს.
გამოძიებით დადგინდა, რომ შეიარაღებული და ნიღბიანი ბრალდებულები გლდანში „საქართველოს ბანკში“ შეიჭრნენ და სიცოცხლის მოსპობის მუქარით ფული მოითხოვეს. ბანკის თანამშრომლებმა განგაშის სიგნალით დაცვის პოლიცია გამოიძახეს. ბანკის ფილიალთან მისულ დაცვის პოლიციას თავდამსხმელებმა ცეცხლი გაუხსნეს.
ბრალდებულებმა, ბანკის ფილიალზე ყაჩაღურ თავდასხმამდე, თავისუფლება უკანონოდ აღუკვეთეს ორ მოქალაქეს და ჩამოართვეს კუთვნილი ავტომანქანა.
„პოლიციის ოპერატიული რეაგირების შედეგად, ბრალდებულები იძულებული გახდნენ მძევლად აყვანილი ორივე მოქალაქე გაეთავისუფლებინათ და შემთხვევის ადგილიდან გატაცებული ავტომანქანით მიიმალნენ. პოლიციამ ჩატარებული საგამოძიებო მოქმედებების შედეგად გატაცებული ავტომანქანა ამოიღო, რომელიც ბრალდებულებმა კვალის დაფარვის მიზნით დაწვეს“, – აცხადებენ შინაგან საქმეთა სამინისტროში.
ამჟამად, დანიშნულია ყველა შესაბამისი ექსპერტიზა და გრძელდება საგამოძიებო მოქმედებები. შსს-ს ინფორმაციით, დადგენილია დანაშაულში მონაწილე მესამე პირის ვინაობაც და მიმდინარეობს ინტენსიური ოპერატიულ-სამძებრო ღონისძიებები მისი დაკავების მიზნით.
„საქართველოს ბანკის“ გლდანის ექსპრეს-ფილიალზე თავდასხმაში სულ სამი პირი მონაწილეობდა. ცნობილია, რომ ბანკის დაყაჩაღებამდე, წინა საღამოს მათ 30 წლის მამაკაცი, ზურაბ ბერიკაშვილი მის კუთვნილ „სუბარუს“ მარკის ავტომობილთან ერთად გაიტაცეს. ამავე ჯგუფის მიერ მოხდა კიდევ ერთი ახალგაზრდა ქალის გატაცება.
თავდამსხმელებმა მძევლები გაკოჭოეს და გატაცებული ავტომობილის საბარგულში ჩასვეს. მეორე დღეს იმავე ავტომობილით გლდანის მე-6 მიკრორაიონში მდებარე ბანკის დასაყაჩაღებლად მივიდნენ. ბანკზე შეიარაღებული თავდასხმიდან მალევე ადგილზე დაცვის პოლიცია და სამართალდამცავები გამოცხადნენ, რომელთა მიმართ თავდამსხმელებმა ცეცხლი გახსნეს. დაზიანებულია დაცვის პოლიციის ავატომობილი. ზურაბ ბერიკაშვილს და მასთან ერთად გატაცებულ ახალგაზრდა ქალს ავტომობილი დაატოვებინეს, თავად კი მიიმალნენ. ოჯახის გადმოცემით, ზურაბ ბერიკაშვილი ვარკეთილში ცხოვრობს და წინა საღამოს გლდანში ახლობლეთან იყო გასული, თუმცა დანიშნულების ადგილამდე არ მისულა.
“პრაიმტაიმს” ზურა ბერიკაშვილის დედამ განუცხადა, რომ მისი შვილი გლდანში მეგობრის სანახავად წავიდა, თუმცა დანიშნულების ადგილამდე არ მისულა.