სახელმწიფო უსაფრთხოების სამსახურის ანტიკორუფციულმა სააგენტომ 2018 წლის განმავლობაში ბრალდებულის სახით სისხლის სამართლის პასუხისგებაში 133 პირი მისცა. ამის შესახებ სუსის 2018 წლის ანგარიშში წერია, რომელიც პარლამენტს გადაეგზავნა.
ანგარიშის თანახმად, 2018 წლის განმავლობაში გამოძიება სისხლის სამართლის 71 საქმეზე დაიწყო, მათ შორის: ქრთამის აღების – 21, ქრთამის მიცემის – 3, თაღლითობის – 12, სამსახურებრივი უფლებამოსილების ბოროტად გამოყენების – 4, მითვისების ან გაფლანგვის – 4, სამსახურებრივი გულგრილობის – 13, სამსახურებრივი სიყალბის – 8 და სხვა ცალკეულ დანაშაულებზე.
ანგარიშის მიხედვით, 2018 წელს სუსმა უკანონო სამეწარმეო საქმიანობის ფაქტზე სისხლის სამართლის პასუხისგებაში მისცა ირანის ისლამური რესპუბლიკის 7 მოქალაქე. ერთი წლის განმავლობაში მათ მიერ უკანონო სამეწარმეო საქმიანობის შედეგად მიღებულმა შემოსავალმა ჯამში 2 097 000 ლარი შეადგინა.
ასევე საანგარიშო პერიოდში სუსმა სამსახურებრივი უფლებამოსილების ბოროტად გამოყენების ფაქტზე დააკავა სამედიცინო საქმიანობის სახელმწიფო რეგულირების სააგენტოს უფროსი, ხოლო დიდი ოდენობით ქრთამის აღებაში დახმარების ფაქტზე – შპს „რეგიონული ჯანდაცვის ცენტრის“ დირექტორის მოადგილე. ამავე სისხლის სამართლის საქმის ფარგლებში, სულ სუსმა დააკავა აფთიაქების 5 მფლობელი და 14 დირექტორი. სულ პასუხისგებაში მიეცა 21 პირი, რომელთა მიერ უკანონო სამეწარმეო საქმიანობის განხორციელებისა და ფსიქოტროპული საშუალებების ურეცეპტოდ რეალიზაციის შედეგად მიღებულმა შემოსავალმა 4 094 709 ლარი შეადგინა.
ასევე ქრთამის აღების ფაქტზე შარშან სუსმა დააკავა: თბილისის საკრებულოს კრწანისის მაჟორიტარი დეპუტატი, მცხეთის მუნიციპალიტეტის მერიის წარმომადგენელი ცხვარიჭამიის ადმინისტრაციულ ერთეულში; სამტრედიის მუნიციპალიტეტის მერის პირველი მოადგილე და საგარეჯოს რაიონის საკრებულოს სოფელ უჯარმის დეპუტატი. ასევე ზუგდიდის ყოფილი მერი და მისი მოადგილე.