სასამართლოში რაც ხდებოდა 2012 წლამდე, ეს იყო ნამდვილი ჯოჯოხეთი. დღეს არის აბსოლუტურად რადიკალური ვითარება,- ამის შესახებ სასამართლო სისტემაზე საუბრისას, „ქართული ოცნების“ პოლიტიკურმა მდივანმა „იმედის“ ეთერში განაცხადა.
ღარიბაშვილის თქმით, მისთვის მთავარია რას გრძნობს მოქალაქე, როდესაც ის სასამართლოში მიდის და აქვს თუ არა მას სამართლიანობის განცდა.
„მთავარი მიღწევები ჩვენი ხელისუფლების და „ქართული ოცნების“ არის ის, რომ ჩვენმა ხელისუფლებამ ქვეყანაშ მოიტანა მშვიდობა, სტაბილურობა და რაც მთავარია, თავისუფლება. ეს ყველაფერი არის ძალიან მყარი საფუძველი იმისა, რომ ქვეყანამ დაიწყოს სწრაფი განვითარება. როცა ჩვენ მოვედით ხელისუფლებაში იყო აბსოლუტურად განსხვავებული ატმოსფერო. „ნაციონალური მოძრაობის“ მმართველობის დროს მე პრაქტიკულად არ მახსენდება წელიწადი სიმშვიდის, ეს არ იყო. ეს იყო შიშის და ტერორის წლები. იყო ძალიან მძიმე გარემო. ეს ყველაფერი შევცვალეთ მოსვლის დღიდან. ჩვენ პრაქტიკულად ყველა უწყების ტრანსფორმაცია მოვახდინეთ, მათ შორის, სასამართლოსი. მთავარი პრობლემა ქვეყანაში მგონია, რომ არის უმუშევრობა, სიღარიბე, ოკუპირებული ტერიტორიები, ეს არის რადიკალური პოლიტიკური გარემო, რომელშიც გვიწევს მოღვაწეობა და დესტრუქციული ოპოზიცია“,- აღნიშნა ღარიბაშილმა.
მისივე თქმით, „ჭკვიანური და მუდმივი პროპაგანდის მეშვეობით ადამიანს შეიძლება მოაჩვენო ჯოჯოხეთი სამოთხედ და პირიქით, სამოთხე ჯოჯოხეთად“.
„სასამართლოში რაც ხდებოდა 2012 წლამდე, ეს იყო ნამდვილი ჯოჯოხეთი. დღეს არის აბსოლუტურად რადიკალური ვითარება. ჩემთვის მთავარია როგორი განცდა აქვთ მოქალაქეებს, რომლებიც მიდიან სასამართლოში, ის გრძობს თუ არა თავს დაცულად, მას ვინმე ხომ არ ჩაგრავს და იქიდან რა გადაწყვეტილებით გამოდის, ეს არის მთავარი და არა ის, რომელი მოსამართლე, თუნდაც ყოფილი ხელისუფლების მხრიდან გადმოჰყვა ჩვენს ხელისუფლებას და რომელი ემსახურება სახელმწიფოს და ხალხს. სასამართლოში ჩვენს ხელისუფლებას აქვს აბსოლუტურად დალაგებული სიტუაცია და ვითარება. მთავარი პრინციპია ჩვენი რომ მოქალაქეს ჰქონდეს სამართლიანობის განცდა“,- განაცხადა ღარიბაშვილმა.