მარნეულში გაუპატიურებულმა ორსულმა გოგონამ თვითმკვლელობა ორჯერ სცადა

მარნეულში, სექსუალური ძალადობის შემდეგ, ორსულმა არასრულწლოვანმა თვითმკვლელობა ორჯერ სცადა. ოჯახის ინფორმაციით, 16 წლის გოგონაზე მეუღლის ნათესავმა, 47 წლის მამაკაცმა ცივი იარაღის მუქარით იძალადა. როგორც ოჯახი ვარაუდობს, ბრალდებულმა საქართველოს საზღვრები უკვე დატოვა. გოგონას დაკითხვა მარნეულის პოლიციაში რამდენიმე საათს გაგრძელდა. ახლა გამოძიება ექსპერტიზის დასკვნას ელოდება. „აღიარა, რომ ჩემი შვილი გააუპატიურა და არ დაუკავებიათ. ორ კვირაზე მეტია გასული. დანით დაემუქრა. ჩემი შვილი უმძიმეს მდგომარეობაშია. ორჯერ სცადა თვითმკვლელობა. დამნაშავემ კი ვეჭვობ საზღვრები დატოვა“,- განაცხადა გოგონას დედამ. გოგონას ოჯახმა „ადამიანის უფლებათა ცენტრს“ დახმარების თხოვნით მიმართა. როგორც ცენტრის წარმომადგენელი აცხადებს, საქმეში უკვე ჩართულია ფსიქოლოგი. „საქმეში ჩართულია ფსიქოლოგი. სცადა წამლების დალევა, მაგრამ გადაიფიქრა, რადგან იზრუნა ჯანსაღი ბავშვის დაბადებაზე. მეორედ თვითმკვლელობა იმიტომ სცადა, რომ ბრალდებული დაკავებული არ არის“,- აღნიშნა „ადამიანის უფლებათა ცენტრის“ ადვოკატმა.