საშენებლო სექტორის წარმომადგენლები დარგში არსებულ რთულ ვითარებაზე საუბრობენ. მიზეზად გაუფასურებული ლარი და ის რეგულაციები სახელდება, რომლებიც ბოლო დროს სამშენებლო და საბანკო სექტორს დაუწესდა. მშენებლების განცხადებით, უძრავი ქონების ბაზარი, თითქმის, სტაგნაციაშია და გაყიდვებმა გასულ წლებთან შედარებით მნიშვნელოვნად იკლო. იმას, რომ სამშენებლო სექტორში ყველაფერი რიგზე არაა, სტატისტიკაც აჩვენებს. მაგალითად, 2017 წელთან შედარებით, 2018 წელს სამშენებლო სექტორის ბრუნვა მიმდინარე ფასებში 3,1 პროცენტით შემცირდა და 3,2 მილიარდი ლარი შეადგინა. მენაშენეთა ასოციაციის ხელმძღვანლის, ირაკლი როსტომაშვილის მოსაზრებით, ახალი რეგულაციები სამშენებლო სექტორს ნამდვილად სჭირდებოდა, თუმცა, პრობლემა შექმნა ამ რეგულაციების დაჩქარებული წესით მიღებამ.
„თუ გვინდა განვითარება და სურვილი გვაქვს, რომ დასავლეთს დავემსგავსოთ, რეგულაციები საჭიროა, თუმცა არა – ასე მყისიერად. სამშენებლო სექტორს უჭირს ახალ რეალობასთან შეგუება და შედეგად მივიღეთ შეჩერებული მშენებლობები, კადრების გადინება და გაზრდილი უმუშევრობა“, – აცხადებს როსტომაშვილი. მისი თქმით, კიდევ უფრო გაართულა მდგომარეობა იმ რეგულაციებმა, რომლებიც ბანკებს დაუწესდათ. როსტომაშვილისთვის გაუგებარია, რა აუცილებლობით იყო ნაკარნახევი ეს რეგულაციები, რომელთა შემოღებამ სამშენებლო სექტორთან ერთად სხვა ბიზნესებსაც გაურთულა საქმიანობა. „ახალი საბანკო რეგულაციები რატომ შემოიღეს, ვერ გავიგე. ამ სექტორში „გაფუჭებული” სესხების მოცულობა 1 %-საც არ აღემატება. ეს მსოფლიო სტანდარტებითაც კი კარგი მაჩვენებელია, ასე რომ, მიზანს ვერ მივხდი“, – აცხადებს როსტომაშვილი. მისი თქმით, შექმნილ სიტუაციაში ერთადერთი სწორი გამოსავალი გადასახადებისა და რეგულაციების შემცირება იქნება. „თუ გვინდა სწრაფი ეკონომიკური განვითარება, საჭიროა ნაკლები გადასახადი და რეგულაცია. ამის საწინააღმდეგოდ რა არგუმენტებიც უნდა დაასახელოს მთავრობამ, ფაქტია, რომ ეკონომიკური სიტუაცია ქვეყანაში გაუარესდა“, – აცხადებს როსტომაშვილი.