ბათუმის კოლონადებთან თაფლის ფესტივალი გაიმართა, რომელიც აჭარის მთავრობის თავმჯდომარემ ზურაბ პარატაძემ და აჭარის სოფლის მეურნეობის მინისტრმა ლაშა კომახიძემ გახსნეს.
ფესტივალი მიზნად ისახავს, აჭარის, როგორც მეფუტკრეობაში წამყვანი რეგიონის პოპულარიზაციას და მეფუტკრეობის დარგის განვითარების ხელშეწყობას.
თაფლის ფესტივალზე წარმოდგენილი იყო 24 მეფუტკრის პროდუქცია, რომელიც რეგიონში არსებული უნიკალური თაფლოვანი მცენარეებისგანაა დამზადებული.
როგორც აჭარის მთავრობაში აცხადებენ, ვიზიტორებს შეეძლებათ სხვადასხვა თაფლის სახეობის დაგემოვნება და ადგილზე შეძენა. ფესტივალი მოიცავს გასართობ ღონისძიებებს, ცოცხალ მუსიკას, კონკურსებს, მასტერკლასებს, სადაც ვიზიტორებს თავად შეეძლებათ მონაწილეობის მიიღება.
ფესტივალს ორგანიზატორი აჭარის სავაჭრო-სამრეწველო პალატასთან არსებული აჭარის მეფუტკრეთა ბიზნეს ასოციაციაა. ფესტივალის მხარდამჭერები არიან აჭარის სოფლის მეურნეობის სამინისტროს ა(ა)იპ აგროსერვის ცენტრი და მცირე კავკასიის ალიანსების აჭარის პროგრამა, რომელსაც შვეიცარიის განვითარებისა და თანამშრომლობის სააგენტოს დაფინანსებით, აჭარის კულტურული მემკვიდრეობის დაცვის სააგენტო და არასამთავრობო ორგანიზაცია მერსი ქორფსი ახორციელებს.