საქართველოს პარლამენტის წევრი, თავდაცვისა და უშიშროების კომიტეტის თავმჯდომარის მოადგილე კობა კობალაძე აცხადებს, რომ პარლამენტში უზენაესი სასამართლოს მოსამართლეობის კანდიდატ თამარ ალანიასგან მუხროვანის ამბოხის საქმესთან დაკავშირებით კითხვებზე პასუხი ვერ მიიღო.
„მარტო მე არა, საზოგადოებამ ვერ მიიღო კითხვებზე პასუხი. კითხვები იმიტომ დავსვი, რომ პასუხი მიმეღო მეც და ჩემ თანამებრძოლებს, მეგობრებს, რომლებმაც ის პერიოდი გაიარეს უსამართლობის განცდით და იმით, რომ ამ ქვეყანაში სამართალი არ დგებოდა. ყველა ადამიანს აქვს სრულყოფილებისკენ სწრაფვის უნარი და შეიძლება, ადამიანმა გადააფასა, ჩამოყალიბდა თავის თავში და ჩვენ რატომ უნდა შევუშალოთ ხელი, მისი სრულყოფილებისკენ სწრაფვას“, – განაცხადა კობა კობალაძემ.
როგორც კობალაძემ აღნიშნა, მან ვერ გაიგო თამარ ალანიას პოზიცია. მისივე განცხადებით, ნებისმიერი ადამიანი, რომელმაც პოლიტიკური ზემოქმედება განახორციელა ყოფილი ხელისუფლების დაკვეთით საქართველოს მოქალაქეებზე, პოლიტიკური დაკვეთის შემსრულებელი იყო.
„მე არ ვარ მოსამართლე, მაგრამ შეიძლება მქონდეს შეგრძნება ზეკანონიერი, სამართლის განცდა, როგორც ბრძანა და ა.შ და მე ამ ჩემს პოზიციაში ვიყო გამყარებული, მაგრამ როდესაც ვსაუბრობთ მოსამართლეზე, მაგიტომ დავსვი საკითხი, იყო თუ არა გაცნობილი კონკრეტულ საქმეს, თუ წინასწარ უკვე განსაზღვრული განაჩენით შევიდა სასამართლო დარბაზში, რადგან ამ პროცესის უნებური თანამონაწილე ვიყავი. გამიჩნდა იმის განცდა, რომ სასამართლოს ხელით ზემოქმედებდა სახელმწიფო და ხელისუფლება. ნებისმიერი ადამიანი, რომელმაც პოლიტიკური ზემოქმედება განახორციელა ყოფილი ხელისუფლების დაკვეთით საქართველოს მოქალაქეებზე, რა თქმა უნდა, იყო პოლიტიკური დაკვეთის შემსრულებელი“, – განაცხადა კობა კობალაძემ.