არასამთავრობო ორგანიზაცია “საფარის“ ინფორმაციით, მსახიობ ეკა ჩხეიძის საქმეზე ბრალდებულს თავისუფლების 2 წლით აღკვეთა მიესაჯა.
ორგანიზაციის ცნობით, ბრალდებული ორი წლის განმავლობაში ეკა ჩხეიძეს დაქორწინებას აძალებდა, წინააღმდეგ შემთხვევაში, თვითმკვლელობით აშანტაჟებდა. იყო შემთხვევა, როდესაც მან ეკა ჩხეიძის საცხოვრებელი სახლის სადარბაზოში პნევმატური იარაღიდან გაისროლა.
“საფარის შუამდგომლობების საფუძველზე, სწორი სამართლებრივი შეფასება მიეცა უჩა მიშველაძის ძალადობრივ ქმედებებს და თბილისის საქალაქო სასამართლოს 2020 წლის 23 იანვრის განაჩენით, მას მიესაჯა 2 წლით თავისუფლების აღკვეთა, 3 წლის გამოსაცდელი ვადით. ასევე, მას 3 წლის ვადით აეკრძალა იარაღის შეძენისა და ტარების უფლება,“ – ნათქვამია საფარის განცხადებაში.
ეკა ჩხეიძის თქმით, რამდენიმე წლის განმავლობაში, უჩა მიშველაძე მას ფაქტობრივად გასაქანს არ აძლევდა, არასასურველი კომუნიკაციით აწუხებდა. ბოლო პერიოდში, ის გახდა აგრესიული, გადმოვიდა სიტყვიერ შეურაცხყოფაზე, ჩხეიძეს უშვერი სიტყვებით მოიხსენიებდა.
შეგახსენებთ, რომ უჩა მიშველაძე პოლიციამ 2019 წლის 28 სექტემბერს ქორწინების იძულების ბრალდებით დააკავა, სასამართლომ ის 3000-ლარიანი გირაოს სანაცვლოდ გაათავისუფლა.