დაავადებათა კონტროლის ეროვნული ცენტრის” ხელმძღვანელის, ამირან გამყრელიძის განცხადებით, საქართველო დაბალი რისკის ქვეყანათა ჯგუფში რჩება, ანუ კორონავირუსის შემთხვევა დადასტურებული არ არის.
მისივე თქმით, ცენტრალური ინფექციური საავადმყოფოს ბოქსირებულ განყოფილებაში მყოფი სამი ადამიანის მდგომარეობა დამაკმაყოფილებელია.
“ჩვენი ქვეყანა დაბალი რისკის ქვეყანათა ჯგუფში რჩება ანუ, კორონავირუსის შემთხვევა არ არის დადასტურებული. ამ ეტაპზე სამი ადამიანია დაკვირვების ქვეშ, ცენტრალური ინფექციური საავადმყოფოს ბოქსირებულ განყოფილებაში. სამივეს კლინიკური მდგომარეობა დამაკმაყოფილებელია. მათზე დაკვირვება მიმდინარეობს. სამივე საქართველოს მოქალაქეა. სამივეს აქვს ჩინეთში, სხვადასხვა პერიოდში ყოფნის ისტორია. აქედან ერთი, ყველაზე უფრო დაზიანებულ რეგიონში, კერძოდ, ქალაქ უხანში იყო.
იცით, რომ ისინი გამოკვლეული არიან 22 რესპირატორულ ვირუსზე, რაზეც ჩვენ ვიკვლევთ “ლუგარის ცენტრში” და ორი ადამიანის სინჯები ევროპის ერთ-ერთ რეფერალურ ლაბორატორიაში, კერძოდ როტერდამშია გადაგზავნილი. დიდი იმედი გვაქვს, რომ პასუხები ხვალ გვექნება.
მაქვს ინფორმაცია, რომ დიდი ალბათობით, 99%-ით, ხვალიდან ჩვენ თვითონ გვექნება ლაბორატორიული საშუალება ლუგარის ცენტრში, რადგან ჩვენს პარტნიორებთან იყო მოლაპარაკება. შესაბამისად, არ იქნება აუცილებლობა რეფერალურ ცენტრებში სინჯების გადაგზავნის”,- განაცხადა გამყრელიძემ.