საქართველოს მესამე პრეზიდენტმა, მიხეილ სააკაშვილმა, „ქართული ოცნების“ გამარჯვების მთავარ მიზეზად ვანო მერაბიშვილის შეცდომები დაასახელა. ამის შესახებ ყოფილმა პრეზიდენტმა ტელეკომპანია „მთავართან“ საუბრისას განაცხადა.
სააკაშვილმა ყოფილ თანაგუნდელს, ციხიდან გამოსვლის შემდეგ, ოჯახთან ერთად დასვენება ურჩია. აშკარაა, „ნაციონალურ მოძრაობაში“ რაღაც ხდება. პარტიას ძველი წევრები ტოვებენ (გასულ კვირას იგი ხუთმა მათგანმა დატოვა). გავრცელებული ინფორმაციით, პარტიიდან მალე გრიგოლ ვაშაძეც წავა. უფრო სწორედ, გაუშვებენ. თუმცა დღეს “ფორტუნასთან” ეს ინფორმაცია უარყვეს და მას “აბსოლუტური სიცრუე”უწოდეს.
“ნაციონალურ მოძრაობაში” განვითარებულ მოვლენებზე „ფორტუნა“ ექსპერტებს ესაუბრა.
პოლიტოლოგ გია ხუხაშვილის აზრით, „ნაციონალური მოძრაობიდან“ ყველა რომ წავიდეს და მხოლოდ მიხეილ სააკაშვილი დარჩეს, პარტია მაინც იარსებებს.
„რომელი ლიდერი გრიგოლ ვაშაძე მყავს? პარტიიდან მისი წასვლით არაფერი შეიცვლება. „ნაციონალური მოძრაობა“ რვა წელია იშლება და ჯერ კიდევ არსებობს. ილუზია არ უნდა გვქონდეს, რომ პარტია დაიშლება. უნდა გვესმოდეს, რომ „ნაციონალური მოძრაობა“ არის ერთი კაცი – სააკაშვილი, ისევე როგორც „ქართული ოცნება“ არის ივანიშვილი. ამ პარტიებში სხვა არავინ არსებობს. ვიღაც წავა და ვიღაც მოვა, ეს არაფერს შეცვლის“, – განაცხადა ხუხაშვილმა.
მისი თქმით, სააკაშვილსა და მერაბიშვილს შორის მოლაპარაკება ვერ შედგა და სწორედ ამიტომ ურჩია ყოფილმა პრეზიდენტმა ყოფილ პრემიერს პოლიტიკისგან დროებით დასვენება.
„მერაბიშვილის შეცდომებზე საუბარს სჯობს, ყველამ საკუთარ შეცდომებს მოუაროს. მერაბიშვილთან დაკავშირებით ზუსტად სააკაშვილმა დაუშვა სერიოზული შეცდომები, როდესაც ის შინაგან საქმეთა სამინისტროდან გამოიყვანა და ამით სამინისტრო ძალიან დააზარალა. მერაბიშვილის პრემიერ-მინისტრობით დაიმსხვრა მითი მისი სააჯაროობის, რადგან ეს მისი ძლიერი მხარე არ იყო. ამ გადაადგილებით სისტემა შეირყა.
ეს გადაადგილებები კი სააკაშვილის ეჭვიანობით იყო გამოწვეული – მან მერაბიშვილზე იეჭვიანა. იფიქრა, რომ შეეძლო ჩვენთან („ქართულ ოცნებასთან“) მოლაპარაკებები დაეწყო. ჩვენი ძირითადი მოკავშირე იმ მომენტში სააკაშვილის ეჭვიანობა და შიშები იყო. ეჭვიანობის საფუძველზე მან გადაწყვიტა მერაბიშვილი ძალოვანი უწყებიდან ჩამოეშორებინა. ჩემი აზრით, ეს იყო სააკაშვილის ფატალური შეცდომა, რამაც „ოცნებას“ 2012 წელს ხელი ძალიან შეუწყო“, – განაცხადა ხუხაშვილმა