COVID-19-ით ინფიცირებული 5 ახალი შემთხვევიდან 1 პაციენტი საუნივერსიტეტო კლინიკაშია მოთავსებული. როგორც პირველი საუნივერსიტეტო კლინიკის გენერალური დირექტორი ლევან რატიანი აცხადებს, მათთან შემოსული პაციენტი ერთ-ერთი კლასტერიდანაა და ინფექციის გამოვლენამდე თვითიზოლაციაში იმყოფებოდა.
“49 წლის ქალი, რომელიც შემოვიდა გუშინ ჩვენს კლინიკაში, აქვს ზედა სასუნთქი გზების ინფექცია. ეჭვი იქნა მიტანილი, ვინაიდან წყარო არსებობდა და იმ კლასტერში იყო, რომელიც ჩვენთან არის. აქედან გამომდინარე, გაიგზავნა ლუგარის ლაბორატორიაში და დადასტურდა covid 19ის არსებობა. ქალბატონი იმყოფებოდა თვითიზოლაციაში. ბოლო რამდენიმე საათში წამოვიდა ტემპერატურა, ყელის სიმშრალე და ამისთვის მომართა კლინიკას,“- განაცხადა ლევან რატიანმა.
შეგახსენებთ, რომ ქვეყანაში ახალი კორონავირუსის, COVID-19-ის 5 ახალი შემთხვევა დაფიქსირდა. ხუთი შემთხვევიდან სამს ევროპაში მოგზაურობის ისტორია აქვს, ორს კი ვირუსი ინფექციურში მყოფი პაციენტებისგან გადაედო. ხუთივე თვითიზოლაციაში ან საკარანტინო სივრცეში იმყოფებოდა.
ამასთან, დღეს COVID-19-ით ინფიცირებული კიდევ 2 პაციენტი გამოჯანმრთელდა. საერთო ჯამში, კორონავირუსი ქვეყნის სამმა მოქალაქემ დაამარცხა.