ამირან გამყრელიძე – გამოცხადებული საგანგებო მდგომარეობა ხელს შეუწყობს ქვეყანაში ფართომასშტაბიანი ეპიდემიის პრევენციას, ამისთვის ყველა ერთად უნდა დავდგეთ

დღევანდელ სხდომაზე მიმოვიხილეთ როგორც გლობალური, ისე საქართველოში არსებული სიტუაცია. ვიმსჯელეთ იმ გამოწვევებზე, რაც შეიძლება იყოს. ჩვენ აღვნიშნეთ, რომ, ჯერჯერობით, ბოლო 3-კვირაზე მეტია, რაც ქვეყანაში პირველი შემთხვევა დაფიქსირდა ინფექციისა, ვპროგნოზირებდით, რომ ზრდა გვექნებოდა და დაახლოებით მივდივართ იმ პროგნოზის ფარგლებში, რაც ჩვენი ერთ-ერთი სცენარით იყო განსაზღვრული, ანუ სერიოზული და სწრაფი ეპიდ-აფეთქება ჯერჯერობით არ ფიქსირდება ქვეყანაში,– ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ კორონავირუსთან დაკავშირებით მოქმედი უწყებათაშორისი საკოორდინაციო საბჭოს ჯანდაცვის თემატური ჯგუფის შეხვედრის შემდეგ განაცხადა, რომელიც საქართველოს პრემიერ-მინისტრ გიორგი გახარიას ხელმძღვანელობით დღეს მთავრობის ადმინისტრაციაში გაიმართა.