რესპუბლიკურ საავადმყოფოში ამ დროისთვის დაკვირვების ქვეშ 50 პაციენტი იმყოფება.
კლინიკის დირექტორის, ლევან გოფოძის განცხადებით, რესპუბლიკურში ამჟამად კორონავირუსით ინფიცირებული 11 პაციენტი მკურნალობს.
მისივე განმარტებით, 26 პაციენტს ტესტირება ჩაუტარდა და კოვიდ 19 არც ერთს დაუდასტურდა.
ლევან გოფოძის განცხადებით, კორონავირუსით ინფიცირებული პაციენტების მდგომარეობა დამაკმაყოფლებელია.
„ამ წუთისათვის რესპუბლიკურ საავადმყოფოში 50 პაციენტი არის დაკვირვების ქვეშ, ახლაც გაყავთ პაციენტები თუ დააკვირდებით, რომლებსაც არ დაუდასტურდათ კორონავირუსის არსებობა. ჩვენთან გუშინ 26 პაციენტს ჩაუტარდა ტესტირება და, ჩვენდა საბედნიეროდ, ოცდაექვსივე იყო ნეგატიური, არც ერთს არ აღმოაჩნდა ვირუსი. რაც შეეხება დანარჩენ პაციენტებს, რომლებიც ჩვენს კლინიკაში არიან,11 პაციენტი გვყავს კოვიდინფიცირებული და, ჩვენდა საბედნიეროდ, ამ 11 პაციენტის მდგომარეობა დამაკმაყოფილებელია, თერთმეტივე იმყოფება ინტენსიური თერაპიის პალატაში, არც ერთს არ სჭირდება მართვითი სუნთქვა ანუ სუნთვის მოშლით არ მიდის მათთან პროცესი მიუხედავად იმისა, რომ უმეტესობასთან პნევმონია არის დადგენილი, თუმცა არ პროგრესირებს ეს პნევმონია, რაც დამაიმედებლად მიმაჩნია“ , – განაცხადა გოფოძემ.
რაც შეეხება რეანიმაციულ განყოფილებაში მყოფ არაინფიცირებულ პაციენტებს, მათგან ერთის მდგომარეობა გაუმჯობესდა.
„გარდა ამისა, უნდა ითქვას, რომ იმ ორი პაციენტიდან, რომლებიც რეანიმაციაში გვყავდა თავიდანვე, თანდათან გაუმჯობესდა ერთი პაციენტის მდგომარეობა. ის მართვით სუნთქვაზე აღარ არის და ჩვეულებრივად სპონტანურ სუნთქვაზე გვყავს, დღითი დღე, ასე ვთქვათ, წინ მივდივართ. რაც შეეხება მეორე პაციენტს, მისი მდგომარეობა კვლაც მძიმე რჩება, მაგრამ იქაც გაუმჯობესება გვაქვს, რაც ასევე საიმედოდ მიმაჩნია. სხვა პაციენტების მდგომარეობა დამაკმაყოფილებელია“ , – განაცხადა ლევან გოფოძემ.
ლევან გოფოძის განმარტებით, დღეს კორონავირუსზე ტესტი კიდევ 20-მდე პაციენტს ჩაუტარდება.
„დღეს კიდევ დაახლოებით 20 პაციენტი მომზადდა ტესტირებისთვის და აღებულ იქნა სინჯები. პასუხს ველოდებით ტრადიციულად გვიან ღამისკენ და ხვალ მოგახსენებთ შედეგებს“ ,- აღნიშნა ლევან გოფოძემ.
ამასთან, ლევან გოფოძის განცხადებით, ვინაიდან მათთან პაციენტები ძირითადად პალატებში ინდივიდუალურად თავსდებიან, კლინიკას ამ დროისთვის დაახლოებით 70 პაციენტის მიღება შეუძლია.
სხვა შემთხვევაში კი, გოფოძის განმარტებით, კლინიკას 120 პაციენტამდე მიღების რესურსი აქვს.
„ამ დროისთვის სავადმყოფოში თავისუფალი ადგილები გვრჩება დაახლოებით 15. ჩვენ, როგორც სიცხის ცენტრი, მოგეხსენებათ, პაციენტებს ვათავსებთ ინდივიდუალურად, პალატებში არ ვაწყვილებთ მათ, თუ არ არიან ერთი ოჯახის წევრები და ასე შემდეგ. თორემ ისე 120 პაციენტამდე შეგვიძლია, მოვიღოთ ჩვეულებისამებრ, მაგრამ ამ წუთისათვის ვფიქრობთ, რომ იმ პირობებში, როდესაც მათი ასე ვთქვათ განცალკევება ხდება, შეგვიძლია თავისუფლად მივიღოთ დაახლოებით 65-70 პაციენტი“ , – განაცხადა გოფოძემ.