საპარლამენტო უმრავლესობის წევრის, პარლამენტის თავდაცვისა და უშიშროების კომიტეტის თავმჯდომარის პირველი მოადგილის, კობა კობალაძის განცხადებით, სახელმწიფო უსაფრთხოების სამსახურის 2019 წლის ანგარიში მომავალი საფრთხეების პრევენციაზეა გათვლილი.
სუს-ის ანგარიში კობალაძემ მედიაჰოლდინგ „კვირასთან“ საუბრისას შეაფასა.
„მარტო ჩემი შეფასებით არა, ჩვენი საერთაშორისო პარტნიორების შეფასებითაც, იმ სახელმწიფოების შეფასებითაც, ვისთანაც აქტიურად ვთანამშრომლობთ, ჩვენი უსაფრთოების სამსახურები საკმაოდ მაღალ სტანდარტებს პასუხობენ და მაღალი სტანდარტებით მუშაობენ. იმიტომ, რომ ბევრი დაფარული საინფორმაციო უზრუნველყოფიდან და ქმედებიდან გამომდინარე, ბევრი რეალური საფრთხე ააცლეს არა მარტო ჩვენს ქვეყანას, არამედ რეგიონს. რა თქმა უნდა, ამ ყველაფერმა გამოიწვია ის, რომ მჭიდრო თანამშრომლობაა.
რაც შეეხება იმას, რომ ამ პანდემიის საფრთხიდან გამომდინარე, შეიძლება, იყოს უფრო მასიური მოძრაობა და ეს კონტროლს უნდა დაექვემდებაროს, რა თქმა უნდა, ესეც ფაქტია.
აქედან გამომდინარე, ანგარიში საკამოდ მოცულობითი, საკმაოდ აზრობრივია და გათვლილია როგორც მომავალი საფრთხეების პრევენციაზე, ასევე იმ რეალურ მოცემულობაზე, რომელშიც ჩვენ ვართ“, – განაცხადა კობალაძემ „კვირასთან“ საუბრისას.