ფოთისა და ხობის მიტროპოლიტმა მეუფე გრიგოლმა მორწმენეებს აღდგომის ბრწყინვალე დღესასწაული მიულოცა.
“ამ ტაძარშიც, რომელიც წმინდა აღდგომის სახელობის არის, აგუგუნდა სააღდგომო ზარები და მთელს ქალაქში ყველა ტაძარში ერთდროულად დაიწყება ზარის რეკვა და ეს იქნება მაუწყებელი ამ დიდებული დღესასწაულისა და მაუწყებელი იმისა, რომ თითოეულმა ადამიანმა, ვისაც ლოცვით სურს ამ დღეს შეხვდეს, ყველამ ერთად დავიწყოთ ლოცვა. ვინც სად არის, ვიღაც სამკურნალო დაწესებულებაშია, ვიღაც სახლშია, ვიღაც სამსახურშია და მორიგეობას აღასრულებს, თითოეულ ადამიანს ვულოცავ ამ ბრწყინვალე დღესასწაულს. დაგვეძლიოს ყველანაირი წინააღმდეგობა,” – აღნიშნა მეუფე გრიგოლმა.
მეუფე გრიგოლის თქმით, მნიშვნელოვანია, რომ მრევლმა მიიღო კურთხევა და სახლში დარჩა.
“მე მოხარული ვარ. მრევლი იმათ ჰქვია, იმ ადამიანებს ვის გულშიც მართლა ანთია განსაკუთრებული რწმენის კანდელი და რომელიც მზად არის, კურთხევა მიიღოს და დაემორჩილოს, ისევე, როგორც ჩვენ ყველა ერთად უნდა დავემორჩილოთ ექიმებს. მე მოხარული ვარ, მადლიერი ვარ, ჩვენ 24 წელია ამ ეპარქიაში ვართ და ვცდილობთ გზადაგზა დავმოძღვროთ და ვასწავლოთ და მათგანაც ვისწავლოთ ძალიან ბევრი რამე, ეს ძალიან მნიშვნელოვანია. ჩვენ ერთმანეთი ძალიან გვიყვარს, პატივს მივაგებთ ერთურთს და იმედი მაქვს, რომ ყველანი ერთად დავძლევთ ამ განსაცდელს, რომელიც დღეს მსოფლიოში მძვინვარებს და მით უმეტეს დღეს ჩვენთან ჯერ კიდევ არ არის ეს მძაფრად და არც იყოს. ნურავინ დამშვიდდება იმით, რომ თუ უკეთესად იქნება საქმე, რომ აი, ჩვენ, რომ მოვსულიყავით მაინც რა კარგი იქნებოდა, არა. აი, ყველაფერი კარგად იქნება და ყველა კურთხევის ქვეშ იქნება,” – აღნიშნა მეუფე გრიგოლმა.
მეუფე გრიგოლის თქმით, ბრწყინვალე შვიდეულში ეპარქია საგანგებო რეჟიმში გააგრძელებს მსახურებას.
“საერთოდ, ვიდრე ეს უბედურება ტრიალებს სამყაროს თავზე და ვიდრე ჩვენი ექიმები გვირჩევენ მოფრთხილებას, დისტანცირებას ერთმანეთისაგან, მანამდე ჩვენ საგანგებო რეჟიმში აღვასრულებთ ხოლმე მსახურებას და ტაძრის გარეთ იქნება მრევლი, ვინც მომსვლელი იქნება, რა თქმა უნდა. ვინც ვერ მოვა, იმათ ჩვენ შევეწევით სულიერად, ჩვენ ცალ-ცალკე არ ვილოცებთ, ჩვენ ყველა ერთად ვილოცებთ,” – განაცხადა მეუფე გრიგოლმა.