„მე ვარ 80 წლის და მე დავამარცხე კორონავირუსი“ – ეს 80 წლის გიული ურუშაძის საჯარო პოსტია. ასაკოვანი ქალბატონი უკვე სახლშია და თავს სრულიად ჯანმრთელად გრძნობს, თუმცა მანამდე იყო ძალიან რთული პროცესი და როგორც უკვე ყოფილი პაციენტი ამბობს, მან სიკვდილ-სიცოცხლის ზღვარზე ურთულესი გზა გაიარა.
„10 დღე-ღამის განმავლობაში ურთულესი გზა გავიარე სიკვდილ-სიცოცხლის ზღვარზე. ჩემი გადარჩენისათვის, ჩემთვის სიცოცხლის შენარჩუნებისთვის, მინდა უდიდესი მადლობა გადავუხადო პირველი საუნივერსიტეტო კლინიკის გენერალურ დირექტორს, პროფესორ ლევან რატიანს და მის არაჩვეულებრივ კოლექტივს, რომელის მუშაობასაც თვალს ვადევნებდი რეანიმაციაში ყოფნის დროს“ – წერს საჯარო პოსტში გიული ურუშაძე.
რაც შეეხება დაინფიცირების ისტორიას, ყოფილი პაციენტი ამბობს, რომ ის რომანოვების კლასტერს მიეკუთვნება და დაინფიცირდა მისი მეგობრის, რუსი ჟურნალისტის საშა რომანოვის ორმოცზე.
„ოჯახმა გადაწყვიტა ორმოცი აქ ჩაეტარებინათ. ვინც იყო ინფიცირებული ხელითაც არ შევხებივარ, შორიდან დავუქნიე ხელი, არ მილაპარაკია და არც გადამიკოცნია. რატომღაც დარწმუნებული ვიყავი, რომ მე ეს არ შემეხებოდა. სიცხეები მქონდა მხოლოდ, მეტი არაფერი არ მაწუხებდა. 25-ში დავიძინე და 6-ში გავიღვიძე, ძალიან გამიკვირდა, რომ ამდენი დრო იყო გასული“, – ამბობს „მოამბესთან“ კორონავირუსისგან გამოჯანმრთელებული 80 წლის ქალი.
გიული ურუშაძე ცნობილი ოჯახიდანაა. ის თავად პროფესიით ინჟინერია და ამ სფეროში საკმაოდ წარმატებულიც, თუმცა მისი სახელი, როგორც სოლიკო ხაბეიშვილის ქვრივი, უფრო ცნობილია.
ხაბეიშვილის სახელი „გუდაურის“ კომპლექის მშენებლობას უკავშირდება. ის ე.წ. საბჭოთა ნომენკლატურის ცნობილი წარმომადგენელი იყო. სიცოცხლის ბოლო წლებში საერთაშორისო ფონდის „დემოკრატია და აღორძინების“ პრეზიდენტი იყო. ახლო მეგობრობა აკავშირებდა ედუარდ შევარდნაძესთან.
ხაბეიშვილი 1995 წელს მოკლეს. იმ დროისთვის საქართველოში პოლიტიკური მკვლელობები უცხო ხილი არ იყო, მაგრამ ხაბეიშვილის მკვლელობამ მაინც დიდი მითქმა-მოთქმა გამოიწვია. გაჩნდა უამრავი კითხვა: – თუ ყველა პოლიტიკური მკვლელობის უკან შევარდნაძე იდგა, მაშინ ვინ დგას შევარდნაძის მეგობრის მკვლელობის უკან?
„ხაბეიშვილის მკვლელობის საქმეს უფრო ღრმად ვერ ჩავეძიებით, იმის იქით უკვე პოლიტიკაა“ –
ეს სიტყვები ამჟამად პარლამენტის წევრს და მაშინ განსაკუთრებით მნიშვნელოვან საქმეთა გამომძიებელს კობა ნარჩემაშვილს ეკუთვნის.
ხაბეიშვილის მკვლელობისთვის „მხედრიონის“ წევრები გაასამართლეს.