არავის უხარია ამ აკრძალვების დაწესება, კარგად გვესმის, რომ ეს არის დიდი ეფექტის მქონე ჩვენს ეკონომიკაზე, მაგრამ იმასაც კარგად ვხვდებით, რომ თუ ჩვენ ეს გადაწყვეტილებები არ მივიღეთ დღეს, თუ ამ გადაწყვეტილებებით არ გავუსწარით მოვლენებს, ნამდვილად ვერ შევძლებთ ჩვენი ეკონომიკის უკან დაბრუნებას იმ პოზიტიურ რელსებზე, რომელზეც აქამდე იყო, – ამის შესახებ საქართველოს პრემიერ-მინისტრის მრჩეველმა, პრესსპიკერმა ირაკლი ჩიქოვანმა განაცხადა.
„რა თქმა უნდა, მესმის ის დიდი და მნიშვნელოვანი დისკომფორტი და პრობლემები, რომელიც შეიძლება ჩვენს მოქალაქეებს შეექმნათ. ჩვენ მაქსიმალურად ვცდილობთ ამის შემსუბუქებას, თუმცა მეორეს მხრივ, ამ ფონზე, ჩვენთვის აბსოლუტურად მიუღებელია იმ პოლიტიკური სუბიექტების სპეკულაციები, რომელიც ემსახურება სხვა არაფერს, გარდა იმისა, რომ რამდენიმე ათეული პროცენტით მოიმატონ არჩევნებზე ხმა და ხალხის უკმაყოფილებაზე და ამ პრობლემაზე შეეცადონ კაპიტალიზაციას“, – განაცხადა ჩიქოვანმა,
მისი თქმით, ყველა შეზღუდვა, რომელიც დღეს მოქმედებს, არის იმისთვის, რომ მაქსიმალურად შემცირდეს ვირუსის გავრცელება.
„დღეს რეალურად საქმე გვაქვს მსოფლიო პანდემიასთან და ყველა კარგად ვხვდებით, რომ ასეთი თანმიმდევრული გადაწყვეტილებები რომ არა, დღეს ჩვენ არ გვექნებოდა ასეთი დაბალი ციფრი COVID 19 ინფიცირების თვალსაზრისით. ძალიან სამწუხაროა, რომ ოთხი ლეტალური შემთხვევა გვაქვს, მაგრამ, რომ არა ეს, ჩვენ გაცილებით სავალალო შედეგები გვექნებოდა. სწორედ ამიტომ, ვცდილობთ ჩვენ, რომ თავის დროზე მივიღოთ სწრაფი და დროული გადაწყვეტილებები, რამაც უნდა შეაჩეროს COVID 19-ის გავრცელება.
იმ ადამიანებს, რომლებიც ამ თემით სპეკულირებენ, მოჰყავთ ევროპული სახელმწიფოს მაგალითი, იმის შესახებ, რომ გარკვეული შეზღუდვები უკვე იხსნება რამდენიმე ევროპულ სახელმწიფოში – დიახ, ეს იხსნება მას შემდეგ რაც მათ გადაიარეს პიკი. საქართველოს ეს პიკი გადავლილი არ აქვს და გვაქვს მოლოდინი, რომ პიკური ვითარება გვექნება და COVID 19-ის გავრცელება პიკს ორი-სამი კვირის განმავლობაში მიაღწევს, სწორედ ამიტომ მივიღეთ ეს გადაწყვეტილება“, – განაცხადა ირაკლი ჩიქოვანმა.
როგორც პრემიერის მრჩეველმა აღნიშნა, მთავრობამ საგანგებო მდგომარეობის 22 მაისამდე გაგრძელებასთან დაკავშირებით უკვე მიმართა საქართველოს პრეზიდენტს, პრეზიდენტმა გამოსცა აღნიშნული გადაწყვეტილება და ამის თაობაზე პარლამენტი უახლოეს პერიოდში იმსჯელებს.
„ისევე, როგორც ყველა გადაწყვეტილება, ეს გადაწყვეტილებაც დაყრდნობილია იმ რეალობაზე, რომელიც ჩვენ გვაქვს ქვეყანაში და იმ რეკომენდაციებზე, რომელსაც ჩვენ ვიღებთ ჩვენი ჯანდაცვის ექსპერტებისგან და სპეციალისტებისგან, რომელთაც უზარმაზარი გამოცდილება აქვთ ეპიდემიებთან ბრძოლის თვალსაზრისით. ჩვენ ვიმედოვნებთ, რომ ამ გადაწყვეტილებით კიდევ უფრო შევუშლით ხელს COVID 19-ის გავრცელებას ჩვენს ქვეყანაში“, – განაცხადა ირაკლი ჩიქოვანმა.