ლენტეხის მუნიციპალიტეტში კორონავირუსისგან 2 პაციენტი უკვე გამოჯანმრთელდა, ისინი 2-3 დღეში კლინიკას დატოვებენ,- ამის შესახებ „რეგიონულ კვირას“ ლენტეხის საავადმყოფოს ეპიდემიოლოგმა ლამზირა ბენდელიანმა განუცხადა.
მედიკოსის განმარტებით, ამ ეტაპზე, ლენტეხის ე.წ ცხელების ცენტრში და ასევე, თვითიზოლაციაში არცერთი ადამიანი იმყოფება.
” ლენტეხში დაინფიცირებული პაციენტებიდან 2 მათგანზე, რომელთა შორის ერთ-ერთი პირველად დაინფიცირებული 53 წლის მამაკაცია, აღებული ორჯერადი ტესტის შედეგები უარყოფითია და ორივე გამოჯანმრთელდა. ისინი 2-3 დღეში დატოვებენ სამედიცინო დაწესებულებას. მაქვს ინფორმაცია იმის შესახებაც, რომ ასე სწრაფად ჯერ არავინ გამოჯანმრთელებულა, ამას ალბათ გენეტიკას თუ დავაბრალით. იმედი მაქვს, დარჩენილი 3 პაციენტიც უახლოეს პერიოდში გამოჯანმრთელდება და ე.წ ლენტეხის კლასტერი წარსულს ჩაბარდება, მაგრამ ისევ მინდა ვთხოვო ჩვენს მოსახლეობას: კიდევ ცოტა მოვითმინოთ,ნუ გაგვათამამებს ეს შედეგები, დავრჩეთ კვლავ სახლში“,- განაცხადა ლამზირა ბენდელიანმა.
მისივე განმარტებით, მთელი ამ პერიოდის განმავლობაში, ლენტეხელ მედიკოსებს დახმარებას რეგიონის ეპიდემიოლოგი – ნატო დვალი და რეგიონის ლაბორანტი – ეთერ ხაბურზანია უწევდნენ.
შეგახსენებთ, ლენტეხის მუნიციპალიტეტში კორონავირუსით დაინფიცირების პირველი შემთხვევა 5 აპრილს დაფიქსირდა.